Երեկ, այսօր և վաղը Դաշնակցությունը եղել, կա և լինելու է այն ուժը, որը հավատարիմ է հայ հողին. Իշխան Սաղաթելյան

• 05.02.2022, 14:47
•  Աշխարհ,  Հայաստան

Երեկ, այսօր և վաղը Դաշնակցությունը եղել, կա և լինելու է այն ուժը, որը հավատարիմ է հայ հողին: Այս մասին ՀՅԴ հիմնադրման 131-րդ ամյակին նվիրված հանդիսության ժամանակ ասել է ՀՅԴ ԳՄ ներկայացուցիչ, ԱԺ փոխխոսնակ Իշխան Սաղաթելյանը, փոխանցում է News.am-ը:

«Դաշնակցությունը անցյալ ունեցող, ներկայով ապրող, ապագայի տեսլականով կազմակերպություն է: Գործելով հայրենիքում և հայրենիքից դուրս դաշնակցությունը միշտ վառ է պահել անկախ պետականության գաղափարը»,-ասաց նա:

Սաղաթելյանը ընդգծեց, որ ե΄ Արցախում, ե΄ Հայաստանում ՀՅԴ-ն մասնակցություն է ունեցել պետականաշինության գործին:

«Այո, այդ տարիներին եղել են և մեծ ձեռքբերումներ, և սխալներ:  Դրանք եղել են մեր զարգացումը դանդաղեցնող, բայց ոչ երբեք կործանարար սխալներ»,- ասաց նա:

Սաղաթելյանի խոսքով` Դաշնակցությունից ժողովրդի սպասելիքները շատ են եղել, բայց տված քվեն քիչ է եղել:

«Մենք ամբողջական իշխանություն չենք ունեցել, դրա համար էլ մաս ենք կազմել տարբեր կառավարությունների: Այո, մենք մեր մասնակցության չափաբաժնով տեր ենք այդ տարիների և լավին և վատին: Մենք սխալներ ունեցել ենք, բայց չեն սխալվում ոչինչ չանողները, բայց ինքներս մեզ, մեր գաղափարներին, մեր համոզմունքներին, մեր նպատակներին երբեք չենք դավաճանել»,- ասաց նա: