Հայաստանին գազ՝ արդեն ռուբլով. ո՞ր կողմի նախաձեռնությունն է սա

• 15.04.2022, 19:12
• Լիլիա Ամիրխանյան
•  «Հայացք» վերլուծական կենտրոն,  Աշխարհ,  Հայաստան,  Վերլուծություն

Հայաստանը ռուսական գազի համար վճարումները կատարում է ռուբլով:  РБК-ին ասել է ՀՀ էկոնոմիկայի նախարարը: Չի վճարելու, չի պատրաստվում, ԱՐԴԵՆ վճարում է: Ավելին, պարզվում է, որ «որքան գիտի էկոնոմիկայի նախարարը» վերջին մի քանի վճարումներն արդեն իսկ ռուբլով են եղել, բայց  «համապատասխան փոխարժեքով»:

Թեմայի կարևորության ու զգայունության մասին երևի ավելորդ է խոսել: Բավական է հիշել, որ հայաստանյան օրակարգում ռուբլով գազ գնելու խոսակցությունները վերջին անգամ ակտիվացան «ոչ բարեկամական երկրներին» ռուբլով գազ վաճառելու ՌԴ որոշմանը  գրեթե զուգահեռաբար: Այս իմաստով, շատ կարևոր հարցադրում էր և շարունակում է մնալ, թե ու՞մ նախաձեռնությունն էր այդ գործընթացը, կա՞ր ընդհանրապես գործընթաց, բանակցություն, թե՞ ոչ: Իրավիճակը շատ նմանվեց նախորդ երեք տարիների ընթացքում հայ-ռուսական գազային բանակցություններին թեմային,  որոնք կային/ չկային, երբ էին սկսվում, երբ՝ ավարտվում և այլ հարցերի հետ կապված ընթացիկ հստակություն չունեինք:

Այսօր էլ, ձևավորված ինֆորմացիայի դեֆիցիտի պայմաններում, նոր տեղեկություններ ենք ստանում, որոնք կրկին կցկտուր պատկեր են ստեղծում:

Եվ այսպես.

!!! Վահան Քերոբյանն ասում է, որ գնագոյացումը տեղի է ունենում դոլարով, սակայն վճարումը կատարվում է ռուբլով: Հույս է հայտնում նաև, որ կողմերը գնագոյացման գործընթացում հակված են ազգային արժույթներին անցման: Արդյունքում

• Հայաստանն այս պահին, փաստորեն, չի օգտվում դոլար-դրամ-ռուբլի փոխարկելիության ճնշումները նվազեցնելու հնարավորությունից, ինչը կարող էր տեղի ունենալ, եթե գնագոյացման հիմքում դոլարը չմնար:

!!! « «Գազպրոմի»՝ Հայաստանին գազ մատակարարելու պայմանագիրն արդեն մի քանի տարի թույլ է տալիս գազի համար վճարել ռուբլով, և այդ հնարավորությունն օգտագործվում է».  РБК-ի հարցմանը պատասխանել է «Գազպրոմի» պաշտոնական ներկայացուցիչ Սերգեյ Կուպրիյանովը։

• Հնարավորությունը կար, բայց այն, փաստորեն, կիրառվեց ոչ թե ավելի վաղ, այլ հիմա, ՌԴ-ի կողմից «ոչ բարեկամական» երկրների նկատմամբ կիրառվող գործիքակազմին զուգահեռ: Ինչու՞:

Տեղի ունեցողի նկատմամբ անհասկանալի դրվագները շատ են ու ևս մեկ անգամ կարևորում են հարցադրումները՝

•  Ու՞մ նախաձեռնությունն էր ռուբլով գազի դիմաց վճարելը,
•  Ի վերջո տարվու՞մ են բանակցություններ, ռազմավարական գործընկերությանը բնորոշ ընկալելի, հասկանալի մակարդակով,
• Կա՞ արդյոք հայ-ռուսական առողջ երկխոսություն, թե՞ նախորդ տարիների իշխանության գործողությունները վերջնակապես են հարվածել այդ հնարավորությանը,
• Իսկ գուցե սա ռուսական կողմի սիմետրիկ պատասխա՞նն է Միլլերին ուղղված բաց նամակին, որի նպատակը, հիշեցնենք,  էներգակիրների համաշխարհային գների անկումից շուտափույթ օգտվելն էր, և որի նախադեպ հանդիսանալու վտանգների մասին բարձրաձայնել ենք բազմիցս: Գուցե աշխատե՞ց նախադեպը: