Մեկնարկում են Երևանի ավագանու ընտրությունների առաջադրումները

• 03.08.2023, 11:25
•  Հայաստան

Երևանի ավագանու հերթական ընտրության քվեարկությունը կանցկացվի 2023 թվականի սեպտեմբերի 17-ին։

Կուսակցությունների, կուսակցությունների դաշինքների ընտրական ցուցակների առաջադրման և գրանցման համար անհրաժեշտ փաստաթղթերը Կենտրոնական ընտրական հանձնաժողով ներկայացվում են՝ 2023 թվականի օգոստոսի 3-ից մինչև օգոստոսի 13-ը՝ մինչև ժամը 18:00-ն:
Կենտրոնական ընտրական հանձնաժողովում կուսակցությունների, կուսակցություն¬ների դաշինքների ընտրական ցուցակների գրանցումը կատարվում է՝ 2023 թվականի օգոստոսի 13-ից մինչև օգոստոսի 18-ը:

Նախընտրական քարոզարշավը կմեկնարկի օգոստոսի 23-ից և կշարունակվի մինչև սեպտեմբերի 15-ը։

Ավագանու ընտրություններում ՔՊ ցուցակը, ինչպես հայտնի է, գլխավորելու է Տիգրան Ավինյանը, «Ապրելու երկիր»-ի թեկնածուն Մանե Թանդիլյանն է։ Ընտրություններին մասնակցելու իրենց մտադրության մասին հայտնել են տարբեր հաղորդումներից հայտնի, բազմաթիվ պլաստիկ վիրահատությունների ենթարկված Լիլի Մորթոն, Տիգրան արզաքանցյանի կինը՝ Նատալյա Ռոտենբերգը, Կենտրոնի նախկին թաղապետ Վիկտոր Մնացականյանը և այլք։
Խորհրդարանական ընդդիմությունն ընտրություններին մասնակցելու վերաբերյալ հստակ հայտարարություն դեռ չի արել։

Նշենք, որ Կենտրոնական ընտրական հանձնաժողովը օգոստոսի 2-ին հյուրընկալել էր Երևանի ավագանու ընտրություններով հետաքրքրված 12 կուսակցության 2 տասնյակից ավելի ներկայացուցչի։