ԵՄ հետ ՀՀ բանակցությունները կմեկնարկեն Ռիգայի գագաթնաժողովին

• 18.04.2015, 22:20
•  Եվրոպա,  Հայաստան

ԵՄ–ի հետ Հայաստանի նոր բանակցությունները կմեկնարկեն Ռիգայի գագաթնաժողովի ժամանակ, «Sputnik-Արմենիա» ռադիոկայանին տված հարցազրույցում  ասել է պատգամավոր, ԱԺ արտաքին հարաբերությունների մշտական հանձնաժողովի անդամ Թևան Պողոսյանը։

 Ավելի վաղ փոխարտգործնախարար Շավարշ Քոչարյանը հայտնել էր, որ Հայաստանն ու Եվրամիությունը մտադիր են գործակցության համաձայնագիր ստորագրել Ռիգայի գագաթնաժողովում մայիսի 21-22–ին ։

 «Ակնկալվում է, որ Ռիգայի գագաթնաժողովին Հայաստանի և ԵՄ–ի միջև կստորագրվի փաստաթուղթ, որը մեկնարկ կտա նոր բանակցություններին»,– ասել է Թ. Պողոսյանը։

 Ըստ նրա` կարող է հայտարարվել նաև հատուկ գործընթացի, մասնավորապես, վիզաների ռեժիմի ազատականացման, «բաց երկնքի» քաղաքականության համատեղ իրագործման կամ «Հորիզոն-2020» ծրագրին Հայաստանի միանալու մասին։

 «Հորիզոն-2020»–ը (Horizon 2020) Եվրոպական միության նորարարությունների և հետազոտությունների ծրագրեն են` 80 միլիարդ եվրո բյուջեով, նշում է ԱՌԿԱ գործակալությունը։