Ադրբեջանում շարունակվում է Ա. Բաղդասարյանի դատավարությունը

• 20.04.2015, 17:17
•  Տարածաշրջան,  ԼՂՀ

Ադրբեջանում շարունակվում է գերեվարված ԼՂՀ քաղաքացի Արսեն Բաղդասարյանի դեմ  «դատավարությունը»։  

Ադրբեջանական աղբյուրների փոխանցմամբ՝ Գյանջայի՝  ծանր հանցագործությունների գործերով դատարանում «վկաները» ցուցմունք են տվել։ Նրանք նշել են, որ գերեվարման պահին Բաղդասարյանը եղել է քաղաքացիական հագուստով։ Այլ մանրամասներ  չեն հաղորդվում։ Դատական գործընթացը կայացել է փակ դռների հետեւում։

 ԼՂՀ քաղաքացուն մեղադրանք է ներկայացվել Ադրբեջանի քրեական օրենսգրքի 218.2 (հանցավոր խմբավորման անդամ լինելու), 29, 120.2.1 (մի խումբ մարդկանց կողմից իրականացված դիտավորյալ սպանության փորձի, կազմակերպված խմբի կամ հանցավոր խմբավորման կողմից նախապես համաձայնեցված սպանության փորձի), 29, 120.2.7 (2 կամ ավելի մարդկանց դիտավորյալ սպանության փորձի), 29, 120.2.12 (ազգային, կրոնական կամ ռասայական ատելության հողի վրա դիտավորյալ սպանության), 29, 282.2 (Ադրբեջանի Հանրապետության տնտեսական ապահովությունը սասանելու նպատակով հաստատությունների, շինությունների, հաղորդակցման միջոցների, կապի միջոցների, բնակչության կենսապահովման օբյեկտների պայթյուն կամ հրդեհ կազմակերպելու, այս կամ այն նպատակներով զանգվածային թունավորման կամ մարդկանց ու կենդանիների շրջանում ինֆեկցիոն հիվանդություններ տարածելու) հոդվածներով։ Բաղդասարյանի գործով Բաքվի զինվորական դատարանը  որպես խափանման միջոց է ընտրել կալանքը։