Անիի ավերակներում Տիգրան Համասյանի համերգը զայրացրել է թուրք ազգայնականներին

• 25.06.2015, 21:16
•  Տարածաշրջան,  Աշխարհ,  Հայաստան,  Սփյուռք

Աշխարհահռչակ ջազային դաշնակահար Տիգրան Համասյանը Հայոց ցեղասպանության 100-ամյակի կապակցությամբ Թուրքիայի, Հայաստանի, Վրաստանի, Լիբանանի, Ֆրանսիայի, Բելգիայի, Շվեդիայի, Չեխիայի, Բրիտանիայի, Գերմանիայի, Լյուքսեմբուրգի, ԱՄՆ-ի ու Ռուսաստանի 100 եկեղեցիներում «Լոյս ի լուսոյ» խորագրով համերգի շրջանակներում, որոնց ժամանակ ներկայացվում են  հայ ազգային երաժշտության նմուշներ, Հայաստանի պետական կամերային երգչախմբի ուղեկցությամբ նախօրեին Վանի Աղթամար կղզում համերգ է տվել:  Մինչ այդ՝ հունիսի 21-ին, նա համերգով հանդես էր եկել Անիի ավերակներում։ Հարկ է նշել, որ Համասյանի՝ Կարսի նահանգում կայացած համերգը զայրացրել է թուրք ազգայնականներին: Այս մասին գրում է թուրքական Hurriet-ը:

Կարսի քաղաքապետ Մուրթազա Քարաչանթան զայրացած հայտարարություն է տարածել՝ Անիի ավերակներում 90 րոպե տևողությամբ Համասյանի և Երևանի կամերային երգչախմբի համերգի կապակցությամբ: Քարաչանթային հատկապես զայրացրել է, որ Համասյանի հագուստը համերգի ժամանակ նման է եղել հոգևորականի հագուստի: «Ինչ-որ մեկը մեր Կարսի բերդում հայկական դրոշ է պարզել, համերգ է տալիս, սակայն դա ի՞նչ արվեստ է։ Ինչո՞ւ են հոգևորականների հագուստով։ Այդտեղ թաքնված իմաստը մեզ էլ կբացատրե՞ք»,- ասել է թուրք ազգայնականը։ Նա նաև համերգին մեծ ուշադրություն դարձրած լրագրողներին մեղադրել է հայերի հետ միասին լինելու համար։

Թուրքական ծայրահեղական «Գորշ գայլեր» շարժման Կարսի թևի առջնորդ Թոլգա Ադըգյուզելը Անիի ավերակներում Համասյանի համերգից հետո սպառնալիք է հնչեցրել Կարսի հայերի հասցեին, տեղեկացնում է Ermenihaber.am՝ վկայակոչելով թուրքական  Radikal-ին: Ադըգյուզելը մամլո ասուլիսի ժամանակ սպառնացել է բոլոր այն հայերին, ովքեր իրենց «այդքան ազատ են զգում Թուրքիայում»: Նա նաև մեղադրել է բոլոր թուրք լրագրողներին և պաշտոնյաններին, ովքեր աջակցում են հայերի ակտիվությանը Թուրքիայում: Թուրք ազգայնականը կոչ է արել հայերին «չփորձել թուրքերի համբերությունը»:

Ավելացնեք, որ նման սպառնալիքները որևէ կերպ չեն անդրադարձել Տիգրան Համասյանի համերգային ժամանակացույցի վրա: Այսպես, այսօր կայանալու է Տիգրան Համասյանի համերգը Դիարբեքիրի Սուրբ Կիրակոս եկեղեցում։ Հունիսի 27-ին Համասյանը կնվագի Կեսարիայի Սուրբ Գրիգոր Լուսավորիչ եկեղեցում, ապա՝ Ստամբուլում։ Աշխարհահռչակ երաժշտի համերգային այս շարքը կավարտվի հունիսի 30-ին: