Ադրբեջանական Նարդարանում արտակարգ դրություն պահպանվում է

• 08.12.2015, 15:26
•  Տարածաշրջան,  Աշխարհ

Ադրբեջանական Նարդարանի շրջափակումը տարածվել է հարևան Բիլգյա և Մաշթագա ավանների վրա: Այդ ավանների Նարդարանին հարակից շրջանները ևս վերցվել են ուժայինների հսկողության տակ: contact.az-ի փոխանցմամբ փողոցների մուտքերը փակել են բետոնե բլոկերով, ինքնաձիգերով զինված պարեկախմբեր են կանգնած: Տեղացիների փոխանցմամբ բոլոր անցնող մեքենաները ստուգվում են, իսկ դրանց սեփականատերերը` խուզարկվում: Նշվում է, որ անցակետերը գործում են շուրջօրյա, և փաստացի այս գոտում արտակարգ դրություն է գործում:

Ինչ վերաբերում է Նարդարանին, ապա այնտեղ իրավիճակը շարունակում է լարված մնալ՝ չնայած արտակարգ միջադեպեր չեն արձանագրվել: Փակ են ոչ միայն գլխավոր, այլ նաև երկրորդական ճանապարհները, մինչ օրս չկա գազ և էլեկտրականություն: Այս կերպ իշխանությունները մտադիր են խիստ հսկողություն պահպանել և բացառել կրոնական ընդդիմության հզորացումը, որի գլխավոր աղբյուրը Նարդարանն է:

Ավելի վաղ Ադրբեջանի ներքին զորքերի հրամանատար, գեներալ-լեյտենանտ Շահին Մամեդովը հայտարարել է, որ «հատուկ օպերատիվ միջոցառումները Նարդարանում կշարունակվեն մինչ դրված խնդիրների ամբողջական իրականացումը և անվտանգության ապահովումը»: Ներքին գործերի նախարարության տվյալներով՝ Նարդարանի բնակիչներից արդեն առգրավվել է 20 միավոր զենք և զինամթերք, և դա այն դեպքում, երբ բնակիչները տեղյակ են շարունակվող հատուկ գործողության մասին և ամեն կերպ «փորձում են թաքցնել իրենց ունեցած զենքը», գրում է haqqin.az-ը:

Հիշեցնենք, որ դեկտեմբերի 1-ին Ադրբեջանի ներքին զորքերի ուժեղացված ստորաբաժանումները մուտք են գործել Նարդարան ավան, որտեղ նոյեմբերի 26-ին տեղացիների և ոստիկանության միջև զինված բախում էին տեղի ունեցել, այն բանից հետո, երբ իրավապահ մարմինները ցերեկային աղոթքի ժամանակ փորձել էին ձերբակալել արմատական հայացքներ քարոզող աստվածաբան Տալե Բագիրզադեին: Արդյունքում զոհվել էր 6 մարդ, այդ թվում՝ երկու ոստիկան: Իշխանությունների պնդմամբ Նարդարանում արդեն երկար տարիներ է խախտվել է սահմանադրական կարգը. շրջանը կառավարվում է ավագների խորհրդի կողմից, որը չի ենթարկվում տեղական ինքնակառավարման մարմիններին։ Նշենք, որ Նարդարանը հայտնի է որպես իսլամիստական բնակչություն ունեցող շրջան, որն, ըստ ադրբեջանական իշխանությունների, հովանավորվում է Իրանի կողմից: Սակայն, հարկ է նշել, որ իրանական կողմը այս մեղադրանքները հերքում է: