Անթիլիասի Մայրավանքում հանդիպել են Ծառուկյանն ու Արամ Ա. Կաթողիկոսը

• 17.11.2016, 13:35
•  Հայաստան,  Սփյուռք

Անթիլիասի Մայրավանքում նոյեմբեր 16-ին տեղի է ունեցել Մեծի Տանն Կիլիկիո կաթողիկոս Արամ Ա-ի ու գործարար, ԱԺ պատգամավոր Գագիկ Ծառուկյանի հանդիպումը: Այդ մասին տեղեկանում ենք կաթողիկոսության պաշտոնական հաղորդագրությունից։
Ըստ աղբյուրի, Գագիկ Ծառուկյանը հատուկ Լիբանան է ժամանել՝ սիրահայությանն իր օգնությունն առաջարկելու և այդ առումով Արամ Ա.-ի պատկերացումներն իմանալու համար:

Ծառուկյանը հայտնել է, թե պատրաստ է շարունակել իր աջակցությունը Սիրիայի հայ համայնքին և ասել, որ Մայրավանք է այցելել նաև Արամ Ա. Կաթողիկոսի օրհնությունն ստանալու:

Արամ Ա-ն շնորհակալություն է հայտնել գործարարին՝ եկեղեցաշինության և բազմաթիվ բարեգործությունների համար և նշել, որ այսօր հայության առաջնահերթ խնդիրներից մեկը մնում է սիրիահայությանն օժանդակելու հարցը:
«Սիրիայի հայ համայնքի պահպանումը ամէ՛ն իմաստով հրամայական է. սակայն նրանք, ովքեր իրենց կամքով հեռանում են Սիրիայից, մեկ ու հստակ հասցե պէտք է ունենան՝  Հայաստան», -ասել է Կաթողիկոսը։
Հանդիպմանը մասնակցել են սփյուռքահայ քաղաքական գործիչներ, հոգևոր առաջնորդներ, համայնքի ներկայացուցիչներ:

Նշենք, որ մեկ տարի առաջ Գագիկ Ծառուկյանը կրկին այցելել էր Անթիլիաս և 500 հազար դոլար  նվիրել սիրիահայությանը և Անթիլիասին: