Գերմանական հայտնի ընկերությունն այլևս Թուրքիային զենք չի վաճառելու

• 29.11.2016, 19:14
•  Եվրոպա,  ԵԱՏՄ,  Աշխարհ

dw.com

Գերմանական «Heckler & Koch» անվանի ընկերությունն այլևս Թուրքիային զենք ու զինամթերք չի վաճառի: Ինչպես հաղորդում է Ermenihaber-ը՝ հղում կատարելով թուրքական «Ntv.com.tr» լրատվակայքին, զենքի արտադրության ոլորտում հայտնի  ընկերությունը որոշ քաղաքական չափանիշների շրջանակներում վերանայել է այն երկրների ցանկը, որոնց զենք է վաճառում:

Այսպիսով, ՆԱՏՕ-ի անդամ երկրները կամ այն երկրները, որոնք այս կազմակերպության հետ սերտ հարաբերություններ ունեն, ինչպես նաև՝ օրինապահության և ժողովրդավարության բարձր մակարդակ ունեցող երկրները ընդգրկվել են «կանաչ ցուցակում»: Ընկերությունը զենք կվաճառի միայն այս ցուցակում ընդգրկված երկրներին:

Նախատեսված չափանիշներին չհամապատասխանող երկրներն, ինչպես օրինակ՝ Սաուդյան Արաբիան, Մեքսիկան, Բրազիլիան, Հնդկաստանը,  Թուրքիան ընդգրկվել են «դեղին ցուցակում»:  «Heckler & Koch» -ը առաջիկայում այլևս չի պատրաստվում այս երկրներին զենք մատակարարել:

Թուրքական կողմի պնդմամբ՝ զենքի մատակարարման վերաբերյալ գերմանական ընկերության և Թուրքիայի միջև ավելի վաղ կնքված պայմանագրերի միակողմանի չեղարկման դեպքում «Heckler & Koch» -ը ստիպված կինի խոշոր փոխհատուցումներ վճարել:

Հիշեցնենք, որ օրեր առաջ Ավստրիայի խորհրդարանում միաձայն ընդունվել էր բանաձև,  որն առաջարկում է Թուրքիայի նկատմամբ զենքի վաճառքի էմբարգո կիրառել: