Բեքարյան. Brexit-ից հետո Թուրքիա-ԵՄ հարաբերություններում հետաքրքիր զարգացումներ են տեղի ունենում

• 03.02.2017, 19:02
•  Տարածաշրջան,  Աշխարհ

Եվրամիության հետ Թուրքիայի հարաբերություններում այս օրերին ականատես ենք լինում բազմաթիվ հետաքրքիր զարգացումների: Այս մասին այսօր «Նովոստի-Արմենիա» մամուլի ակումբում տեղի ունեցած ասուլիսի ժամանակ ասել է ՀՀ ԱԺ պատգամավոր, «Եվրոպական Ինտեգրացիա» ՀԿ նախագահ Կարեն Բեքարյանը:

«Brexit-ի ֆոնին հետաքրքիր էր Բրիտանիայի վարչապետ Թերեզա Մեյի այցը Թուրքիա, որը տեղի ունեցավ անմիջապես ԱՄՆ կատարած այցից հետո: Այցի արդյունքում կողմերը քննարկեցին հարցերի լայն շրջանակ, ձեռք բերվեցին տնտեսական համագործակցության խորացման, համատեղ ռազմական ինքնաթիռի ստեղծելու պայմանավորվածություններ: Ընդամենը երեկ էլ ավարտվեց Անգելա Մերկելի այցը Թուրքիա», - նշել է Բեքարյանը՝ հավելելով, որ այս այցը նույնպես բավականին հետաքրքիր էր և ցույց տվեց երկու երկրների հարաբերություններում եղած միտումներն ու առկա կնճիռները, որոնք չի հաջողվում հարթել:

«Թուրքիան և ԵՄ-ն ունեն խնդիրներ և’ գլոբալ, և’ լոկալ մակարդակներում: Գլոբալ խնդիրներից է միգրանտներին առնչվող հարցերը, որոնք չեն կարողանում այն լուծումը ստանալ, որոնք կակնկալեին երկու կողմն էլ միաժամանակ՝ անկախ համաձայնագրից: Հետաքրքիր է, որ Մերկելն իր այցի ժամանակ հարցը մի փոքր այլ ուղղություն տեղափոխեց՝ նշելով, որ եթե Թուրքիան միգրանտների հարցով կոնկրետ ծրագրեր ներկայացնի, ապա կֆինանսավորվեն այդ ծրագրերը», - նշեց պատգամավորը:

Ըստ նրա՝ չնայած նրան, որ սրա վերաբերյալ Թուրքական կողմի լայն արձագանք դեռևս չկա, ակնհայտ է, որ ձևաչափի որոշակի փոփոխություն է տեղի ունենում: