Մակրոն-Պուտին հանդիպում. ի՞նչ նպատակներ էին հետապնդում կողմերը

• 30.05.2017, 22:20
•  Եվրոպա,  Աշխարհ

kremlin.ru

Կարևորագույն համաշխարհային խնդիրները հնարավոր չէ լուծել առանց Ռուսաստանի հետ երկխոսության: Նման հայտարարությամբ է հանդես եկել Ֆրանսիայի նախագահ Էմանուել Մակրոնը Փարիզում ՌԴ Նախագահ Վլադիմիր Պուտինի հետ համատեղ ասուլիսի ընթացքում:

Ֆրանսիական նոր ղեկավարության կողմից Ռուսաստանի հետ համագործակցության կարևորության ընկալման մասին վկայում է նաև այն փաստը, որ Պուտինն առաջին օտարերկրյա առաջնորդն էր, ում ընդունել է Մակրոնը նախագահի լիազորությունները ստանձնելուց հետո: Մայիսի 29-ին կայացած բանակցությունների ժամանակ կողմերն առաջնահերթ կարգով քննարկել են Սիրիայում ԻՊ ահաբեկչական խմբավորման դեմ պայքարին առնչվող հարցեր: «Անհրաժեշտ է այս ճգնաժամին տալ քաղաքական լուծում և խաղաղություն վերահաստատել»,- ասել է Մակրոնը՝ հավելելով, որ քիմիական զենքի կիրառման հարցում իրենք «կարմիր գիծ» են տեսնում:

Քննարկման թեմաների թվում է եղել նաև իրավիճակն Ուկրաինայում, կողմերը վստահություն են հայտնել, որ պետք է շարունակել աշխատանքը Նորմանդական ֆորմատում: Միևնույն ժամանակ, Մակրոնը հայտարարել է, որ Ուկրաինայի արևելքում իրավիճակի սրման դեպքում պատրաստ է նոր պատժամիջոցներ սահմանել Ռուսաստանի նկատմամբ:

Կողմներն անդրադարձել են նաև Չեչնիայում սեռական փոքրամասնությունների հանդեպ հետապնդումների մասին տեղեկություններին, Ֆրանսիայում կայացած նախագահական ընտրություններին: Ասուլիսի ժամանակ Մակրոնը կրկին ռուսական լրատվամիջոցներին մեղադրել է իր մասին կեղծ տեղեկություններ տարածելու մեջ: Նրա խոսքերը մասնավորապես վերաբերել են Sputnik-ին և RT-ին: Ռուսական կողմն էլ հերթական անգամ հերքել է այս մեղադրանքները. ՌԴ նախագահի մամլո քարտուղար Դմիտրի Պեսկովը նշել է, որ Կրեմլում համաձայն չեն Sputnik-ի և RT-ի մասին Մակրոնի ասածների հետ:

Նշենք, որ նախապես ծրագրված էր, որ երկու առաջնոդների հանդիպումը կտևի երկու ժամ, սակայն բանակցություններն ավելի երկար տևեցին, ինչը վկայում է, որ դրանք այդքան էլ հարթ չեն ընթացել: Մակրոնը նախապես զգուշացրել էր, որ բավականին կոշտ բանակցող է լինելու Պուտինի հետ հանդիպմանը: Ամեն դեպքում, կողմերը փորձել են հնարավորինս խուսափել առճակատումից. հանդիպումն առաջինն էր և, կարելի է ասել, ճանաչողական բնույթ էր կրում:

Մյուս կողմից, Պուտինը այս հանդիպմամբ ցանկանում էր բարելավել Ֆրանսիայում նախագահական ընտրությունների արդյունքում ձևավորված վատ իմիջը, իսկ Մակրոնին պետք էր ցույց տալ, որ միջազգային հարաբերություններում Ֆրանսիայի առաջատար դերակատամանն ուղղված քայլեր արդեն ձեռնարկվում են: Այս համատեքստում Արևմուտքի հիմնական մրցակից Ռուսաստանի հետ բանակցությունները թերևս ամենախոսունն են:

Հետաքրքրական է, որ Պուտին-Մակրոն հանդիպումը կայացավ Իտալիայում «Մեծ յոթնյակի» գագաթաժողովից հետո: Կարծես թե Մակրոնը Պուտինին փոխանցեց ակումբի եզրակացությունները, որից Ռուսաստանը հեռացված է:

Այսպիսով, Մակրոն-Պուտին հանդիպումն ավելի շատ կարելի է դիտարկել ոչ թե որպես ռուս-ֆրանսիական հարաբերություններում  դրական զարգացման ազդանշան (ինչպես երևում է Մակրոնի հայտարարություններից, Ռուսաստանի նկատմամբ Փարիզի քաղաքականությունը նրա օրոք կլինի նույնական համաեվրոպական քաղաքականության հետ), այլ որպես միջազգային հարթակում ֆրանսիական դերակատարման ակտիվացման առաջին քայլ: