Պետք է համախմբվենք մեր հայրենիքի շուրջ․ Արամ Ա-ի շնորհավորական ուղերձը

• 21.09.2018, 13:54
•  Հայաստան,  Սփյուռք

Հայաստանի Հանրապետության անկախության 27-ամյակի առթիվ հայ ժողովրդին ուղերձով է դիմել Կիլիկիո կաթողիկոս, Ն.Ս.Օ.Տ.Տ. Արամ Ա.-ն։ Ինչպես հայտնում է Tert.am-ը, անդրադառնալով հայ ժողովրդի անկախության կերտման և վերակերտման հավաքական հավատքին, ամուր վճռականությանն ու միասնականության հրամայականին:
 
Վեհափառ Հայրապետը նշել է, որ անկախ հայրենիքը, բնականաբար, ունեցել է թերություններ ու հաջողություններ, սակայն շարունակել է հայրենաշինության աշխատանքը՝ շնորհիվ մեր ժողովրդի գործուն մասնակցության։

«Հայրենիքը հզորացնելն ու ծաղկեցնելը սովորական գործ չէ ու չի կարող լինել, այն առաքելություն է գերազանցապես,-ընդգծել է Հայրապետն՝ ավելացնելով,-ներկա Հայաստանը դեմ հանդիման է նոր մարտահրավերների, որոնց դիմագրավումը հայ ժողովրդի բոլոր զավակների գիտակից մասնակցությունն է պահանջում»:

Նորին Սրբության խոսքով՝ անկախության օրը ցնծության օր է. միաժամանակ հրավեր է՝ իրապաշտ ոգով ու քննական հայացքով ինքնաքննության համար, որպեսզի նպատակասլաց կերպով կարողանանք կերտել հայրենիքի ապագան:

Խոսելով Հայաստանի ներկա կացության մասին, Վեհափառ Հայրապետը նշել է, որ «հայրենիքը գտնվում է տագնապներով լի խաչմերուկի դիմաց, որի համար ազգի ներքին միասնականությունը հրամայական անհրաժեշտություն է»։

Հետևաբար, Նորին Սրբութիւնը կոչ է արել հեռու մնալ ներքին բևեռացումներ ու լարվածություն առաջացնող մոտեցումներից ու արտահայտություններից, թե՛ Հայաստանում, թե՛ Սփյուռքում:

«Պետք է համախմբվենք մեր հայրենիքի շուրջ. մեր միակամությունը հզորության աղբուր է և երաշխիքն է մեր հայրենիքի ու ժողովրդի հաջողության»,-ասել է նա:

Ապա, անդրադառնալով Հայաստանի ներկա իրավիճակին, Հայրապետը թվարկել է այն տագնապները, որոնց դիմակայելու համար համահայկական ճիգեր են անհրաժեշտ, օրինակ՝ Հայաստանում օրինականության ամրապնդումը, հայ ժողովուրդին կենսամակարդակի բարելավումը, տնտեսական կյանքի ծաղկումը, արտագաղթի կասեցումը, Արցախի անկախության ամրապնդումը և Հայաստանի միջազգային հարաբերությունների ընդլայնումը:

Վեհափառ Հայրապետը շեշտել է հայոց բանակի առանցքային դերն անկախության պահպանման հարցում. «Մեր նոր օրերի թշնամիներից գիշեր ու ցերեկ պաշտպանողը մեր արի տղաներն են՝ մեր նոր օրերի հերոսները: Մենք հայոց բանակին հետ ենք՝ բառի ամբողջական իմաստով»,- շեշտել է նա:

Անդրադառնալով հայ ազգի գոյատևման պայքարում հայ եկեղեցու ունեցած դերակատարության՝ Արամ Ա.-ն ասել է. «Հայ եկեղեցին Ս. Գրիգոր Լուսավորչի հոգևոր հեղափոխությամբ, Ս. Մեսրոպ Մաշտոցի մշակութային հեղափոխությամբ և Խրիմյան հայրիկի մարտունակութեամբ, Հայաստանի անկախության դրոշակակիրն է դարձել:

Մեր եկեղեցին մեր պատմության բոլոր ժամանակներում իր արյունն է թափել Հայաստանի անկախության համար, որովհետև մեր եկեղեցին մեր ժողովուրդն է։ Այս գիտակցությամբ ու հանձնառությամբ մեր եկեղեցին կոչված է շարունակել իր հավատքի առաքելությունը և ժողովուրդին ծառայելը՝ միշտ մնալով հայրենիքի կողքին, ջատագովը հանդիսանալով մեր հայրենիքի անկախության»։