ԱԳ նախարարը փորձում է համատեղել անհամատեղելին

• 27.08.2019, 14:53
• Հերմինե Մխիթարյան
•  «Հայացք» վերլուծական կենտրոն,  Աշխարհ,  Հայաստան,  ԼՂՀ,  Վերլուծություն

«Հայաստանը հստակ արտահայտել է իր մոտեցումները Ղարաբաղյան խաղաղ կարգավորման առնչությամբ և այս տեսակետից կցանկանայի առանձնահատուկ ընդգծել Հայաստանի վարչապետ Նիկոլ Փաշինյանի՝ Ստեփանակերտում մարտի 12-ին Հայաստանի Հանրապետության և Արցախի Հանրապետության Անվտանգության խորհուրդների համատեղ նիստում և օգոստոսի 5-ին Վերածննդի հրապարակում անցկացված հանրահավաքին հնչեցրած դրույթները»,- ՀՀ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի ընթացքում ունեցած իր ելույթում նշեց ԱԳ նախարար Զոհրաբ Մնացականյանը: Հղումը Նիկոլ Փաշինյանի արցախյան ելույթին, որի ընթացքում վարչապետի կողմից հնչեցվել էր «Արցախը Հայաստան է, և վերջ» բանաձևը, սակայն, չխանգարեց ԱԳ նախարարին նորից բարձրաձայնել Արցախը բանակցային սեղան լիարժեք վերադարձնելու անհրաժեշտության մասին՝ պնդելով. «Արցախի ժողովրդի ինքնորոշման իրավունքը և բոլոր պայմաններում կիրառելի մարդու անօտարելի իրավունքները ենթադրում են նաև ազատ կամարտահայտում, որը ներառում է նաև Արցախում ազատ ընտրությունների իրականացումը և այդ ընտրությունների արդյունքում ձևավորված իշխանության ներկայացուցիչների գործուն ներգրավումը բանակցային գործընթացում»:

Հատկանշական է, որ ԱԳՆ-ն այլևս չի փորձում սրբագրել վարչապետ ելույթը, այսօր ԱԳ նախարարը փորձում է արդեն համատեղել անհամատեղելին, գտնել ընկալելի ու ընդունելի լուծում վարչապետի էմոցիոնալ հայտարարությունների և ռեալպոլիտիկի արանքում: Այս ջանքերը, գուցե, որոշակի արդյունք ապահովեն ներքին լսարանի հետ աշխատանքներում, սակայն միջազգային հանրության, և, առաջին հերթին, ԵԱՀԿ Մինսկի խմբի համանախագահների հետ աշխատանքում, Ադրբեջանի հետ բանակցություններում մենք ստիպված ենք լինելու հստակեցնել մեր դիրքորոշումը: Ի վերջո՝ Արցախը Հայաստան է, և վե՞րջ, թե՞ Արցախն իր ինքնորոշման իրավունքի համար պայքարող, միջազգային ճանաչում դեռևս չունեցող պետություն է, ով պիտի լինի իր ապագայի համար ընթացող բանակցություններում լիարժեք կողմ: