ՆԱՏՕ-ն կպաշտպանի ժողովրդավարությունն Ուկրաինայում, սակայն չի սադրի ՌԴ-ին, Ուկրաինա զորք չի ուղարկի. Տրյուդո

• 01.03.2022, 11:10
•  Եվրոպա,  Ամերիկա,  Աշխարհ

ՆԱՏՕ-ի երկրները մտադիր չեն իրենց զինուժն ուղարկել Ուկրաինա: Այս մասին մամուլի ասուլիսում հայտարարել է Կանադայի վարչապետ Ջասթին Տրյուդոն, գրում է ՏԱՍՍ-ը։

«Մենք ՆԱՏՕ-ի ղեկավարների գագաթնաժողով ենք անցկացրել, որտեղ քննարկել ենք ապագայի մեր տեսլականը, թե ինչպես ենք աշխատելու միասին, պարզ է, որ մենք չենք պատրաստվում զորքեր ուղարկել Ուկրաինա»,- ասել է նա։

Նրա խոսքով՝ արևմտյան երկրները մտադիր են շարունակել պաշտպանել ժողովրդավարությունը Ուկրաինայում, սակայն չեն սադրի Ռուսաստանի Դաշնությանը և չեն ձգտի սրել իրավիճակը։

«Մենք վճռական ենք միասին շարունակելու ամուր կանգնել ժողովրդավարության պաշտպանության համար: Մենք չենք հրահրելու (Ռուսաստանի Դաշնությանը), մենք չենք ձգտի էսկալացիա», - ասել է Տրյուդոն: Վարչապետը հավելել է, որ Կանադան, ԱՄՆ-ն և Եվրոպան պատրաստ են «պաշտպանել (իրենց) արժեքներն ու ազատությունները»։

Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։

Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։

Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։