Մակրոնն ասել է, որ նախագահական ընտրությունների երկրորդ փուլը վճռորոշ է լինելու Ֆրանսիայի և Եվրոպայի համար

• 11.04.2022, 09:31
•  Եվրոպա,  Աշխարհ

Ֆրանսիայում ապրիլի 24-ին նշանակված նախագահական ընտրությունների երկրորդ փուլը որոշիչ է լինելու երկրի և ողջ Եվրոպայի կյանքում։ Այս մասին հայտարարել է հանրապետության նախագահ Էմանուել Մակրոնը, ով կիրակի օրը դուրս է եկել նախագահական ընտրությունների եզրափակիչ փուլ, փոխանցում է ՏԱՍՍ-ը: 

«Կոչ եմ անում համախմբվել մեծ քաղաքական շարժման մեջ»,- ասել է նա՝ դիմելով Փարիզի Վերսալյան դարպասների մոտ հավաքված իր կողմնակիցներին։ «Ես խնդրում եմ բոլոր համաքաղաքացիներին, անկախ նրանց հայացքներից, աջակցել ինձ երկրորդ փուլում, դա որոշիչ կլինի երկրի և ամբողջ Եվրոպայի համար»,- ասել է Մակրոնը։

Նախագահը շնորհակալություն է հայտնել այն թեկնածուներին, ովքեր արդեն երկրորդ փուլում իրենց աջակցությունն են հայտնել։ «Սա վճռորոշ պահ է մեր ազգի ապագայի համար, և ես ցանկանում եմ ձեռք մեկնել բոլոր նրանց, ովքեր ցանկանում են աշխատել Ֆրանսիայի համար»,- ասել է նա։

Նախնական տվյալներով՝ Մակրոնը «Ազգային հանրահավաքի» առաջնորդ Մարին Լը Պենի հետ միասին անցել է նախագահական ընտրությունների երկրորդ փուլ։