Ֆրանսիայի Մոնպելիեի քաղաքապետարանին հարող ընդարձակ զբոսայգին անվանակոչվել է Հայաստանի անունով

• 18.05.2022, 11:34
•  Եվրոպա,  Աշխարհ,  Հայաստան

Ի նշան հայ-ֆրանսիական բարեկամության՝ Ֆրանսիայի Մոնպելիեի քաղաքապետարանին հարող ընդարձակ զբոսայգին անվանակոչվել է Հայաստանի անունով:

Իր խոսքում դեսպան Տոլմաջյանը երախտիքի խոսք է հայտնել Մոնպելիեի քաղաքային խորհրդին և քաղաքապետ Դըլաֆոսին՝ քաղաքի կենտրոնական զբոսայգիներից մեկը Հայաստանի անունով անվանակոչելու որոշման համար: Նա ընդգծել է, որ այն հարգանքի տուրք է Հայաստանի և Մոնպելիեի միջև ամուր բարեկամությանը, որը սկիզբ է առնում դեռևս միջնադարից, երբ ակտիվ շփումներ էին հաստատվել Ֆրանսիայի պատմական Լանգըդոկ շրջանի և Կիլիկիայի հայկական թագավորության միջև։ Այս համատեքստում դեսպանը նաև հիշատակել է հայոց վերջին արքայի՝ Լևոն 5-րդ Լուսինյանի հանդիսավոր հյուրընկալումը Մոնպելիե քաղաքում։

Ելույթներին հաջորդել է մշակութային ծրագիր, որի ընթացքում հնչել են Եղիշե Չարենցի բանաստեղծություններ, Շառլ Ազնավուրի և մի շարք այլ հայ հեղինակների երգեր՝ Մոնպելիեի Հայկական ընկերակցության դպրոցի երեխաների կատարմամբ, ինչպես նաև դուդուկով կատարումներ ու հայկական ազգագրական պարեր՝ Ֆրանսահայ երիտասարդաց միության (JAF) ներկայացուցիչների մատուցմամբ։

Միջոցառումից հետո դեսպան Տոլմաջյանը գրառում է կատարել Մոնպելիեի «Ոսկե գրքում»:

Հայաստանի զբոսայգու բացման հանդիսավոր արարողությանը ներկա էին նաև Էրո դեպարտամենտի սենատոր Հուսեին Բուրգին, Արցախի Հանրապետության ներկայացուցիչ Հովհաննես Գևորգյանը, Մարսելում Հայաստանի հյուպատոս Սամվել Լալայանը, Մոնպելիեի փաստաբանական խորհրդի նախագահ Նիկոլաս Բեդել դը Բուզարենգեսը, նույն խորհրդի նախկին նախագահ Լյուկ Կըրկաշարյանը, ինչպես նաև հայ հոգևոր դասի ներկայացուցիչներ, Էրո դեպարտամենտի շրջանային և Մոնպելիեի քաղաքային խորհուրդների անդամներ։