Հայաստանը երբևէ չի կապել Ադրբեջանի տարածքային ամբողջականությունը Արցախի ճակատագրի հետ. ԱԳ փոխնախարար

 Sputnik. Հայաստանի և Ադրբեջանի միջև ենթադրյալ շրջանակային փաստաթուղթը պարունակում է ընդհանուր սկզբունքներ, որոնց վրա պետք է կառուցվեն երկու երկրների հարաբերությունները։ Այսօր լրագրողների հետ ճեպազրույցում հայտարարեց ԱԳ փոխնախարար Պարույր Հովհաննիսյանը, հաղորդում է Sputnik Armenia-ն։

«Այն ընդգրկում է տարածքային ամբողջականության ճանաչում այն ձևաչափով, որով 2 երկրները ճանաչել են իրենց անկախությունը և տարածքային ամբողջականությունը Ալմա–Աթայի հռչակագրի հիման վրա»,– հայտարարեց նա։

Փոխնախարարը վստահեցրեց, որ Հայաստանը երբևէ չի կապել Ադրբեջանի տարածքային ամբողջականությունը Արցախի ճակատագրի հետ։

Անդրադառնալով բանակցություններին՝ փոխարտգործնախարարը նշեց, որ չկան ռուսական, ֆրանսիական, եվրոպական կամ ամերիկյան տարբերակներ, կան բացառապես հայկական և ադրբեջանական տարբերակներ։ Բանակցություններն ընթանում են երկու երկրների մոտեցումներով։

«Բանակցային գործընթացն այժմ ընթանում է տարբեր ուղղություններով՝ խաղաղության պայմանագիր, սահմանազատում և սահմանագծում, հաղորդակցությունների ապաշրջափակում, մարդու իրավունքների և անվտանգության ապահովում»,– ասաց նա։

Պարույր Հովհաննիսյանը հայտարարեց նաև, որ Պրահայում հոկտեմբերի սկզբին հաջողվել է համաձայնության հասնել բանակցությունները շարունակելու հարցում:

Հիշեցնենք` նոյեմբերի 16-ին Փաշինյանը Ազգային ժողովում հայտարարեց, որ Հայաստանի Հանրապետությունը Ադրբեջանի հետ խաղաղության պայմանագիր կնքելու վերաբերյալ երկու մոտեցում ունի` դետալացված և շրջանակային համաձայնագրի մոդել։

Շրջանակային համաձայնագրի մոդելի մոտեցումն այն է, երբ շրջանակը գծվում է առանց մեծ կոնկրետությունների։ Փաշինյանը նշեց` փորձը ցույց է տալիս, որ հարցերը շատ դետալացված լուծելու պարագայում կարող են դժվարություններ ի հայտ գալ։ Այս է պատճառը, որ ՀՀ–ն առաջարկել է խաղաղության շրջանակային համաձայնագիր ստորագրել, և սա ընդունված պրակտիկա է։ Հայաստանը նույնպես պետք է աշխատի գնալ այս ճանապարհով։