«Ճոճանակը» պատասխանում է այսօր դաշտում առկա մի շարք մանիպուլյացիների. Աննա Կարապետյան

• 03.02.2023, 18:18
•  Հայաստան,  Հարցազրույց

-         Տիկին Կարապետյան, վերջերս կայացավ Ղարաբաղյան հակամարտության մասին Ձեր և Կարեն Բեքարյանի «Ճոճանակ» գրքի շնորհանդեսը: Նախ, ինչո՞ւ «Ճոճանակ», ինչո՞վ է պայմանավորված վերնագրի ընտրությունը: 

-         Ճոճանակը խորհրդանշում է մեր պարտության վերջնական չլինելը: Ներկայիս իրավիճակն ակնհայտ բալանսների խախտում է դեպի Ադրբեջանի կողմը: Իսկ Ճոճանակը կանգ է առնում միայն հավասարակշռության վերականգնման պարագայում: Ուստի, գալու է այդ հավասարակշռությունը վերականգնելու ժամանակը, իսկ մինչ այդ ճոճանակը կանգնած չէ:

Այսօր մեր խնդիրը պետք է լինի պատրաստվել ու ջանք գործադրել այդ հավասարակշռությունը վերականգնելու համար:

-         Ըստ Ձեզ, ո՞րն է այս գրքի թիրախ լսարանը: 

-         Թիրախային լսարանն, իրականում, շատ մեծ է: Գիրքը կարող է հետաքրքիր ու օգտակար լինել և՛ ուսանողների, և՛ լրագրողների, և՛ ոլորտի մասնագետների ու քաղաքական գործիչների համար:

Ըստ էության, այն հնարավորություն է տալիս ամփոփ պատկերացում կազմել Արցախյան հակամարտության կարգավորման բանակցային գործընթացի բոլոր փուլերի, ամենակարևոր իրադարձությունների, հանրային ընկալումների ու ՀՀ տարբեր իշխանությունների վարած քաղաքականության մասին:

Ոմանց համար սա տեղեկատվության աղբյուր կդառնա ու խնդիրն ուսումնասիրելու սկզբնակետ՝ կհուշի, թե՛ ինչին կարելի է ուշադրություն դարձնել և ինչն է պետք հավելյալ կարդալ: Իսկ ոմանց համար ուղղակի մտածելու տեղիք կտա, այլընտրանք վերլուծական հայացք կառաջարկի ու քննարկման առիթ կդառնա:

Ամենակարևորը թերևս այն է, որ գիրքը պատասխան է պարունակում այսօր դաշտում առկա մի շարք մանիպուլյացիների և տալիս է հարցերի պատասխաններ, որոնք ծնվում են ու կա՛մ պատասխան չեն ստանում, կա՛մ խիստ սուբյեկտիվ պատասխան են ստանում:

-         Վերջին տարիներին հատկապես հանրության շրջանում բավականին ակտիվ են քննարկումները՝ թե Ղարաբաղյան հակամարտության համատեքստում ինչու այսօր ունենք նման վիճակ: Եվ, ըստ էության, գիրքը ևս քննարկում է այդ թեմայով: Ինչո՞վ է այս քննարկումը տարբերվում մյուսներից, ի՞նչն է «ճոճանակը» դարձնում տարբերվող և կարևոր:

-         Եթե համեմատենք դաշտում առկա բանավոր քննարկումների հետ, ապա «Ճոճանակը» դրանցից տարբերվում է իր համակարգվածությամբ: Այսինքն, այո՛, սա նույնպես զրույց է այսօր քննարկվող հարցերի շուրջ, բայց մասնագիտական, տեղեկացված ու խորքային վերլուծական և որ շատ կարևոր է՝ մաքսիմալ օբյեկտիվ զրույց: Մենք չենք փորձել պաշտպանել կամ մեղադրել որևէ մեկին, ճիշտ կամ սխալ գտնել, պարզապես համադրել, վերլուծել ենք կարևորագույն փուլերն ու փաստերը, այսօրվա աչքերով փորձել ենք գնահատել դրանք:

Այս թեմային նվիրված բազմաթիվ գրքերից ու մասնագիտական գրականությունից «Ճոճանակը» տարբերվում է շարադրման ոճով: Գիրքը զերծ է մասնագիտական բառակազմից ու տերմինաբանությունից, տեսական մոտեցումներից, գիտական բարդությունից՝ այն շարադրված է զրույցի տեսքով, մաքսիմալ պարզ ու հասկանալի լեզվով է ներկայացված ցանկացած ընթերցողի համար՝ այդ թվում այն մարդկանց, որոնք առաջին անգամ հենց այս գրքով են սկսելու ծանոթանալ թեմային, կամ հետաքրքրված են, բայց մասնագետներ չեն ու ցանկանում են պարզ լեզվով կարդալ այն, ինչ կարևոր է գործընթացները հասկանալու համար:

-  Ձեր կարծիքով, ի՞նչ է «Ճոճանակը» տալու ընթերցողին:

- Տեղեկատվություն, մտածելու տեղիք ու շատ հարցերի պատասխաններ: