Գրիգորի Խաչատուրովին կալանավորելու միջնորդությունը մերժվել է

• 21.02.2023, 19:07
•  Աշխարհ,  Հայաստան

Հակակոռուպցիոն դատարանը, դատավոր Տիգրան Դավթյանի նախագահությամբ, 3-րդ բանակային կորպուսի նախկին հրամանատար, գեներալ Գրիգորի Խաչատուրովին կալանավորելու միջնորդությունը մերժվել է, հայտնում է Panorama-ն։

Խաչատուրովի շահերի պաշտպան  Հակոբ Ենոքյանը նշեց, որ փաստաթուղթը ձեռքն է,բայց դեռ չի հասցրել ծանոթանալ։ Որոշմանը ծանոթանալուն պես՝ կտարծեն հայտարարություն։
Նա նշեց, որ դատարանի դահլիճից Խաչատուրովն ազատ է արձակվել և գնում է տուն։

Դատարանի դիմաց հավաքվածները ծափահարություններով դիմավորեցին, միաժամանակ վանկարկելով՝ «Նիկո՛լ դավաճան», «առանց թուրքի՝ Հայաստան»։

Հիշեցնենք, որ  Գրիգորի Խաչատուրովը ձերբակալվել է նախօրեին պաշտպանության նախկին նախարար Սեյրան Օհանյանին առնչվող քրեական վարույթի շրջանակներում: Գրիգորի Խաչատուրովի նկատմամբ քրեական հետապնդում է հարուցվել՝ պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացում) հատկանիշներով։

Գործը վերաբերում է  Արարատի մարզի Արմաշ համայնքում հողատարածքի գնմանը։ Ըստ դատախազության տարածած հաղորդագրության, հողատարածքը գնած Էդգար Արշակյանը Գրիգորի Խաչատուրովին փոխկապակցած անձ է։ Էդգար Արշակյանին այսօր կրկին մեղադրանք են առաջադրել, խափանման  միջոց է կիրառվել բացակայելու արգելքը։