Կան լուրջ հարցեր, որոնք որոշիչ են Արցախի՝ հայտարարված կարմիր գծերի բովանդակությանն առնչվող զարգացումներում. Կ. Բեքարյան

• 24.02.2023, 18:16
• Կարեն Բեքարյան
•  Տարածաշրջան,  «Հայացք» վերլուծական կենտրոն,  Աշխարհ,  Հայաստան,  ԼՂՀ

 «Արմեդիա» ՏՎԳ: Արցախի նախագահը փետրվարի 23-ի ելությում, բացի Ռուբեն Վարդանյանին պետնախարարի պաշտոնից ազատելուց, խոսեց նաև Արցախի կարմիր գծերի և հետագա պայքարի մասին: Ըստ ձեզ, Արցախի շահերի տեսանկյունից որքանո՞վ է  այսօր արդյունավետ ընտրված մարտավարությունը և ի՞նչ զարգացումների կարող ենք ականատես լինել Արցախի շուրջ առաջիկայում:

Կարեն Բեքարյան: Մինչև կարմիր գծեր ասվածի ներքո եղած կոնկրետ բովանդակության մասին խոսելը պետք է մի շարք կարևոր տարանջատումներ անենք:

Առաջինը, բովանդակությանն անդրադառնալն իմաստավորված է, եթե այն հայտարարողի նկատմամբ կա գոնե մինիմալ վստահություն: Մինչև բովանդակությանը հասնելը երկրորդ շատ կարևոր խնդիրն առկա լրջագույն հարցերն են, որոնք որոշիչ նշանակություն ունեն՝ այդ թվում բովանդակությանն առնչվող զարգացումներում: Նախ, բանակցող կողմերի կարգավիճակային տեսանկյունից ի՞նչ բանակցություններ են լինելու: Սա շատ կարևոր հարց է: Կարևոր է նաև թե ի՞նչ ձևաչափով և ի՞նչ միջնորդության ներքո են այդ բանակցություններն ընթանալու,  ովքե՞ր կամ ո՞վ է բանակցողը: Վերջին հարցի հետ կապված կարևոր է և պետք է հիմք ընդունվի ոչ թե այն, ինչ հայտարարում է այդ բանակցողը,  այլ նրա անցած ճանապարհը, դրա նկատմամբ վստահությունը կամ վստահության բացակայությունը: Եվ վերջապես, ի՞նչ օրակարգով են ընթանում այդ բանակցությունները:

Անգամ այս չորրորդ կետի պարագայում հայտարարվածը սրա հետ լիակատար հատման մեջ չի, քանի որ, եթե կա բանակցություն, օրակարգը  ձևավորվելու է երկու կողմերի առաջադրած հարցերով: Այսինքն, օրակարգ ասելով՝ ի նկատի ունեմ նաև Ադրբեջանի կողմից առաջադրվածը:

Ուստի, երբ վերընշված հարցերը կունենան իրենց պատասխանները, այդ ժամանակ միայն արժե անդրադառնալ Արցախի՝ հայտարարված կարմիր գծերի բովանդակությանը, դետալներին և այլն:

Կրկնեմ, որ այդ կարմիր գծերը հայտարարողի խոսքին վստահության առումով շատ լուրջ հարցեր կան, որոնք մեկ օրում չեն կարող վերանալ՝  առավել ևս, որ այդ հայտարարողի խոսքի և գործի տարամիտումը չի ավարտվում: