Հրատապ է դառնում ԼՂ և Լաչինի միջանցք անհապաղ միջազգային փաստահավաք առաքելության գործուղման անհրաժեշտությունը. Նիկոլ Փաշինյան

• 09.03.2023, 11:38
•  Տարածաշրջան,  Աշխարհ,  Հայաստան,  ԼՂՀ

Մարտի 5-ի ահաբեկչությամբ Ադրբեջանը մի քանի նպատակ էր հետապնդում: Այս մասին այսօր՝ մարտի 9-ին, կառավարության նիստում հայտարարեց ՀՀ վարչապետ Նիկոլ Փաշինյանը, փոխանցում է news.am-ը:

Նա նաև հավելեց. «Առաջինը ԼՂ ներկայացուցիչների հետ հետագա բանակցությունների վիժեցումը և նոր ռազմական սադրանքի համար անհրաժեշտ ֆոն ստեղծելն է:  ԼՂ ԱԳՆ-ն երեկ հանդես է եկել  հայտարարությամբ՝ արտահայտելով պատրաստակամություն շարունակելու խոսակցությունը Ադրբեջանի հետ և սա  չափազանց կարևոր հայտարարություն է:

Մարտի 5-ի սադրանքի հաջորդ նպատակն էր ստեղծել կեղծ ապացույցներ, թե Հայաստանից ԼՂ զենք, զինամթերք է տեղափոխվում: Այս թեման Ադրբեջանի համար կարևոր է հատկապես Արդարադատության միջազգային դատարանի փետրվարի 22-ի որոշումից հետո, երբ դատարանը միանշանակ ու աներկբա մերժեց Հայաստանի նկատմամբ ժամանակավոր կիրառելու Ադրբեջանի պահանջը, որով Ադրբեջանը ՀՀ-ին մեղադրում էր ականապատումներ իրականացնելու մեջ: Այդ մերժմամբ արդեն մի քանի ամիս միջազգային հարթակներում Հայաստանի դեմ ծավալվող անհիմն մեղադրանքները ականապատումների մասին փլուզվեցին:  Սա չափազանց կարևոր էր:

Եվ ահա  Ադրբեջանը մարտի 5-ի միջադեպը փորձ էր անում ներկայացնել որպես ՀՀ-ից ԼՂ զենք, զինամթերք  տեղափոխելու ապացույց, ինչը չստացվեց երկու պատճառով: Նախ, ոստիկանության ՈՒԱԶ-ը ոչ թե գնում էր դեպի Ստեփանակերտ, այլ Ստեփանակերտից էր դուրս եկել, երկրորդ, Ադրբեջանի հարձակումը և նաև ՈՒԱԶ-ի հետագիծը Ստեփանակերտից մինչև դեպքի վայր, նկարահանվել էր ԼՂ ՆԳ նախարարության տեսախիցիկների կողմից, ինչից ակնհայտ էր դառնում, որ ոստիկանական ավտոմեքենայում բացի փաստաթղթերից ու տաբելային զենքերից, որևէ այլ բան չի եղել»:

Ադրբեջանի հաջորդ կարևոր նպատակը, ըստ Փաշինյանի, հետևյալն էր. արյունոտ ահաբեկչությամբ ձևավորել նոր խոսույթներ, տեղեկատվական նորանոր հոսքեր, որոնք կծածկեն կարևորագույն մի փաստ, այն, որ Ադրբեջանը բացահայտ կերպով չի կատարում միջազգային դատական ատյանի՝ Արդարադատության միջազգային դատարանի որոշումը Լաչինի միջանցքը բացելու վերաբերյալ:

«Հիշեցնեմ, որ պարտադիր իրավական ուժ ունեցող որոշմամբ  դատարանն Ադրբեջանին պարտադրել է ձեռնարկել իրեն հասու բոլոր միջոցները երաշխավորելու Լաչինի միջանցքով քաղաքացիների, տրանսպորտային միջոցների ու բեռների երկու ուղղություններով անխափան տեղաշարժը: Եվ ահա այս որոշումը 15 օր շարունակ չի կատարվում, և սա բացառապես Ադրբեջանի պատասխանատվությունն է:  Դեռ հակառակը, Ադրբեջանը գնում է նորանոր սադրանքների իրադրությունը ԼՂ-ում էլ ավելի սրելու համար:

Այս ամենի ընդգծումով ավելի ու ավելի հրատապ է դառնում ԼՂ և Լաչինի միջանցք անհապաղ միջազգային փաստահավաք առաքելության գործուղման անհրաժեշտությունը՝ կանխելու համար Ադրբեջանի կողմից նոր ագրեսիայի սանձազերծումը և ԼՂ-ի ժողովրդին էթնիկ զտումների ու ցեղասպանության ենթարկելու Ադրբեջանի ակնհայտ նախապատրաստությունները, որոնք արտահայտվում են միջազգային դատարանների որոշումները չկատարելով, Լաչինի միջանցքը փակ պահելով, ռազմական սադրանքներ և ահաբեկչական գործողություններ ձեռնարկելով»,-հայտարարեց Փաշինյանը:

Նա նաև վերահաստատեց Հայաստանի տարածաշրջանում խաղաղության հասնելու ձգտումը և հավատարմությունը խաղաղության օրակարգին: