Ուկրաինան է Սաակաշվիլիին ուղարկել Վրաստան երկիրն ապակայունացնելու համար. Ղարիբաշվիլի

• 13.03.2023, 12:12
•  Եվրոպա,  Տարածաշրջան,  Աշխարհ

EADaily

«Քանի դեռ «Վրացական երազանքը» իշխանության է, թույլ չի տա երկրորդ ճակատի բացում Վրաստանի տարածքում»,-այս մասին հայտարարել է Վրաստանի վարչապետ Իրակլի Ղարիբաշվիլին։
Վրաստանում իշխանափոխության մասին խոսակցություններն ակտիվացան Թբիլիսիում տեղի ունեցած բողոքի ակցիաներից հետո։ Հազարավոր մարդիկ դուրս եկան փողոց՝ բողոքելով օտարերկրյա գործակալների մասին օրենքի դեմ։ Արդյունքում իշխող ուժը հետ կանչեց օրենքը։

«Վերջին օրերին մենք ունեցանք ամբողջական լյուստրացիա բոլոր այն մարդկանց, որոնք պաշտպանում են երկրորդ ճակատի բացումն ու երկրի ապակայունացումը։ Այստեղ միավորվել են մոտ 300 ոչ կառավարական կազմակերպություններ, իհարկե, նաև «Միասնական ազգային շարժումը», որի գլխավոր նպատակը Վրաստան պատերազմ բերելն է»,-ասել է Ղարիբաշվիլին։
Imedi-ի եթերում նա հայտարարել է, որ Ուկրաիանան է Սաակաշվիլուն ուղարկել Վրաստան, որպեսզի ապակայունացնի այդ երկրում իրավիճակն ու պատերազմ բերի։
«Ուկրաինայում պատերազմի սկսելը ակնկալվում էր դեռ 2021-ի նոյեմբեր-դեկտեմբերին։ Մենք այդ մասին ինֆորմացիա ունեինք, ես էլ մեր գործընկերներից գիտեի այդ մասին։ Ե՞րբ է Սաակաշվիլին եկել Վրաստան։ Հոկտեմբերի 1-ին։ Նրան ուղարկել են կազմակերպված, գլխավոր նպատակն է եղել այստեղ հեղափոխություն իրականացնել և երկիրը պետք եղած ժամանակ  պատերազմում ընդգրկելը։ Այսօր մենք դրանում որևէ կասկած չունենք»,-ասել է Վրաստանի վարչապետը։

Նրա խոսքով, եթե իշխանության ղեկին հայտնվի Սաակաշվիլի հիմնած «Միասնական ազգային շարժում» կուսակցությունը, ապա Վրաստանը կդառնա պոլիգոն  և երկիրը կստանա «երկրորդ Մարիուպոլ», այդ դեպքում Ուկրաինան ժամանակ կշահեր։