ՀՀ-ն փորձում է ԼՂ-ի ճակատագրի պատասխանատվությունը բարդել երրորդ երկրների վրա. ՌԴ ԱԳՆ

Հայաստանը փորձում է Լեռնային Ղարաբաղի ճակատագրի պատասխանատվությունը բարդել երրորդ երկրների վրա։ Այս հայտարարությունն արել է Ռուսաստանի ԱԳՆ-ի պաշտոնական ներկայացուցիչ Մարիա Զախարովան՝ մեկնաբանելով ՀՀ վարչապետի խոսքերն այն մասին, որ ՌԴ-ն Լեռնային Ղարաբաղի անվտանգության երաշխավորն է, հաղորդում է Սպուտնիկ Արմենիան:

Զախարովայի խոսքով՝ Ռուսաստանի բոլոր պարտավորություններն ամրագրված են նոյեմբերի 9-ի եռակողմ հայտարարության մեջ. բավական է նայել փաստաթուղթը և կարելի է հասկանալ, թե ինչ պարտավորություններ կան, ինչ պարտավորություններ չկան։

«ՌԴ խաղաղապահներն իրենցից կախված ամեն ինչ անում են, որպեսզի սրացում թույլ չտան և կայունացնեն իրավիճակը։ Դա անում են իրենց պատասխանատվության գոտում։ Իհարկե, շատ բան կախված է նաև ներգրավված բոլոր կողմերի գործողություններից և հայտարարություններից։ Մենք կարծում ենք, որ այդ հայտարարությունները պետք է կառուցողական լինեն և ուղղված լինեն ընդհանուր հաջողությանը»,-ասել է Զախարովան։

Զախարովայի խոսքով՝ հաճախ ՌԴ ԱԳՆ հայտարարությունների հետեւում մանրակրկիտ ջանքեր, տիտանական աշխատանք է կանգնած՝ ուղղված բոլոր պայմանավորվածությունների իրականացմանը:

«Մենք Հայաստանի ղեկավարության հայտարարությունները դիտարկում ենք որպես այն գծի շարունակություն, որը վերցրել են Եվրամիության հովանու ներքո անցկացված Պրահայի գագաթնաժողովում։ Ուստի հայկական կողմի, Հայաստանի ղեկավարության խղճին ենք թողնում Լեռնային Ղարաբաղի ճակատագրի համար պատասխանատվությունը երրորդ երկրների վրա բարդելու փորձերը»,-ասել է Զախարովան։

Հարցին, թե արդյոք Ռուսաստանը պետք է պաշտպանի Ղարաբաղը, եթե Ադրբեջանը ցանկանա վերահսկողության տակ վերցնել խաղաղապահների պատասխանատվության գոտում գտնվող տարածքները, Զախարովան պատասխանել է, որ կարող է մեկնաբանել միայն ընթացիկ իրավիճակը:

«Տեղին չէ խոսել այն մասին, թե այս ամենը ինչ տեսք կունենար, եթե ինչ-որ բան կատարվեր։ Եվ այս դեպքում շատ վնասակար է, որովհետև դա շահարկումների կհանգեցնի։ Կլինի՞ ինչ-որ բան, որը արձագանք կպահանջի, մենք կարձագանքենք։ Մոդելավորմամբ զբաղվելը չափազանց վտանգավոր է»,-նշել է Զախարովան։

Ավելի վաղ Հայաստանի վարչապետ Նիկոլ Փաշինյանը, պատասխանելով Արցախի դեմ Ադրբեջանի ագրեսիայի դեպքում գործողությունների մասին հարցին, հայտարարել էր, որ Լեռնային Ղարաբաղի անվտանգության երաշխավորի գործառույթն իր վրա է վերցրել Ռուսաստանի Դաշնությունը։