Վլադիմիր Պուտինը և Ռեջեփ Էրդողանը քննարկել են թուրք-սիրիական հարաբերությունների կարգավորումը

• 25.03.2023, 17:56
•  Տարածաշրջան

Ռուսաստանի և Թուրքիայի նախագահներ Վլադիմիր Պուտինը և Ռեջեփ Էրդողանը հեռախոսազրույցի ընթացքում քննարկել են թուրք-սիրիական հարաբերությունների կարգավորումը, հաղորդում է NEWS.am` հղում կատարելով Կրեմլի մամուլի ծառայությանը:

Քննարկվել են տարբեր ոլորտներում ռուս-թուրքական գործընկերության ակտուալ թեմաները։ Կողմերը գոհունակություն են հայտնել առևտրատնտեսական կապերի դրական դինամիկայի, էներգետիկայի ոլորտում համատեղ ռազմավարական նախագծերի հաջող իրականացման, այդ թվում՝ գազի մատակարարման և Թուրքիայում «Աքքույու» ատոմակայանի կառուցման կապակցությամբ»,-ասվում Է Կրեմլի հաղորդագրության մեջ: 

«Թուրքիայի նախագահը ևս մեկ անգամ անկեղծորեն շնորհակալություն է հայտնել երկրաշարժի հետևանքների հաղթահարման գործում ցուցաբերած օգնության, այդ թվում՝ Հաթայ նահանգում ռուսական դաշտային հոսպիտալի՝ վերջերս տեղակայման համար: Պայմանավորվածություն է ձեռք բերվել նաև մշակել Ռուսաստանից շինանյութերի մատակարարումների հաստատման հնարավորությունները՝ վերականգնելու ավերված ենթակառուցվածքները։ 

Թուրքիայի նախագահը դրական է գնահատել ստամբուլյան պայմանավորվածությունների գործողության ժամկետը 60 օրով երկարաձգելու Ռուսաստանի համաձայնությունը, որոնք վերաբերում են Սևծովյան նավահանգիստներից ուկրաինական հացահատիկի արտահանմանը և ռուսական պարենի ու պարարտանյութերի արտահանման ապաշրջափակմանը: Ընդ որում՝ ըմբռնում են հայտնել ռուսական կողմի սկզբունքային տրամադրվածության մասին՝ հասնելու նշված պայմանավորվածությունների երկրորդ մասի ամբողջական կատարմանը՝ Ռուսաստանից գյուղատնտեսական արտադրանքի համար արգելքների վերացման վերաբերյալ։

Անդրադարձ է կատարվել սիրիական հիմնախնդրին։ Ընդգծվել է թուրք-սիրիական հարաբերությունների կարգավորման գործընթացի շարունակման կարևորությունը։ Թուրքիայի նախագահն այդ կապակցությամբ հատուկ ընդգծել է Ռուսաստանի կառուցողական միջնորդական դերը։

Օգտվելով առիթից՝ Վլադիմիր Պուտինը շնորհավորել է Ռեջեփ Էրդողանին և թուրք ժողովրդին մահմեդականների համար սուրբ Ռամադան ամսվա կապակցությամբ»,-ասվում է հաղորդագրության մեջ ։