Արցախում տեղի ունեցողը ցեղասպանություն է. Փարիզի քաղաքապետ

Արցախի Հանրապետությունում տեղի ունեցողը նման է ցեղասպանության։ Այս մասին Արցախի նախագահ Արայիկ Հարությունյանի հետ համատեղ ասուլիսի ընթացքում ասաց Փարիզի քաղաքապետ Անն Իդալգոն, փոխանցում է Սպուտնիկը։

Ասուլիսը տեղի է ունենում Սյունիքի մարզի Գորիս քաղաքում, իսկ Հարությունյանն Արցախից տեսակապով է միացել։

«Մենք այստեղ ենք, որպեսզի մեր աջակցությունը հայտնենք։ Մեր պատվիրակությունում Ֆրանսիայի 6 շրջանից ներկայացուցիչներ, ինչպես նաև կուսակցությունների նախագահներ։ Արցախում կան երեխաներ, ծերեր, կանայք, տղամարդիկ, որոնք այլևս չեն կարողանում իրենց հողի վրա արժանապատվորեն ապրել։ Մենք կոչ ենք անում հարգել միջազգային իրավունքը։ Խոսելով պարզ բառերով` կարող եմ ասել, որ այն, ինչ այսօր տեղի է ունենում Արցախում, նման է ցեղասպանության։»,– նշեց Իդալգոն։

Նա ընդգծեց, որ իրենք (պատվիրակության անդամները,– խմբ.) դիմում են Ֆրանսիայի նախագահ Էմանուել Մակրոնին, որպեսզի օգտագործի ՄԱԿ ԱԽ–ում ունեցած իր դիրքը, որպեսզի Արցախի ժողովրդի իրավունքները հարգելու նպատակով բանաձև ընդունվի։

Հիշեցնենք, որ Անն Իդալգոն Հայաստան է ժամանել օգոստոսի 30-ին` Արցախ ուղարկվող հումանիտար օգնությունն անձամբ ուղեկցելու և պետությանը շտապ օգնություն ցուցաբերելու համար։