Ժամանակն է պատժամիջոցներ կիրառել Ադրբեջանի նկատմամբ. Նատալի Լուազո

Ժամանակն է պատժամիջոցներ կիրառել Ադրբեջանի նկատմամբ։ Նման հայտարարություն է արել Եվրախորհրդարանի արտաքին հարաբերությունների հանձնաժողովի անվտանգության և պաշտպանության ենթահանձնաժողովի նախագահ Նատալի Լուազոն` անդրադառնալով Արցախում օրեցօր աղետալի դարձող հումանիտար ճգնաժամին:

«Լեռնային Ղարաբաղում հումանիտար աղետ է. ժամանակն է պատժամիջոցներ կիրառել Ադրբեջանի նկատմամբ»,–գրել է Լուազոն X–ում (նախկինում` Twitter)։

Նա նաև վերահրապարակել է BBC-ում հրապարակված. «Լեռնային Ղարաբաղ. մարդիկ ուշաթափվում են հացի հերթում» հոդվածը, փոխանցում է Սպուտնիկը:

Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։

Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։ Եվս մեկ կցորդիչով բեռնատար ուղարկել էին ֆրանսիական տեղական ինքնակառավարման մարմնները։ Այնուհետև քաղցրավենիքով լի մեկ բեռնատար էլ ուղարկել էր «Գրանդ Քենդի» ընկերությունը։