Պետք է կարողանալ պատասխան տալ սեփական արարքների համար. Զախարովան` Փաշինյանին

ՌԴ արտգործնախարարության պաշտոնական ներկայացուցիչ Մարիա Զախարովան պատասխանել է ՀՀ վարչապետ Նիկոլ Փաշինյանի այն հայտարարությանը, թե անվտանգության առումով միայն 1 կենտրոնից հանրապետության կախվածությունը ռազմավարական սխալ էր։ Ճեպազրույցի ժամանակ Զախարովան հայտարարել է, որ պետք է կարողանալ սեփական արարքների համար պատասխան տալ, ոչ թե անդադար ու ամեն առիթի ժամանակ մեղավորներ փնտրել, փոխանցում է Sputnik Արմենիա-ն։

Զախարովան այս առնչությամբ կարծում է, որ հրապարակային հռետորաբանությունը, որը գրեթե կոպտության է հասնում, Հայաստանի քաղաքական գործիչներին չի սազում։ ՌԴ ԱԳՆ ներկայացուցչի խոսքով, եթե նրանք ուզում են խոսել փորձագիտական, քաղաքական մակարդակներով, ապա դրա համար կան բոլոր հնարավորությունները, Երևանի հետ կապի հրաշալի ուղիներ կան` բոլոր ուղղություններով։ Միևնույն ժամանակ, Զախարովան կարծում է, որ այնտեղ անգամ դերերն են գրված, թե ով ինչպես պետք է խոսի։ Ամեն դեպքում, դա չի սազում մարդկանց, որոնք ներկայացնում են հայ հասարակությունը։