Փարիզի ահաբեկչուհին Սիրիա է անցել թուրքական մաֆիայի օգնությամբ

• 20.01.2015, 11:12
•  Եվրոպա,  Մերձավոր Արևելք,  Աշխարհ

Ֆրանսիայում ոստիկանությունը շարունակում է Հայաթ Բումեդյենի որոնումները, ով մեղադրվում է Փարիզի ահաբեկչության նախապատրաստմանն օժանդակելու մեջ: Պարզվում է՝ ահաբեկչուհու հետքերը տանում են Թուրքիա: The Mirror թերթը՝ հղում անելով թուրքական հետախուզության իր աղբյուրներին, գրում է, որ «Իսլամական պետություն» ահաբեկչական խմբավորման զինյալները վճարել են թուրքական մաֆիային, որ վերջինս ապահովի Հայաթ Բումեդյենի անվտանգ տեղափոխումը: Թերթի տվյալներով ահաբեկչուհուն Ստամբուլի օդանավակայանում դիմավորել են թուրքական մաֆիայի 2 ներկայացուցիչներ: Նրան հաջողվել է հասնել թուրք-սիրիական սահմանի վրա գտնվող Շանլիուրֆա քաղաք, որտեղ նրան տեղավորել են թուրքական մաֆիային պատկանող շենքում: Այնուհետև նա շարժվել է դեպի Ալ-Աբյադ քաղաք, որտեղից էլ անցել է Սիրիա:

Թուրքական հետախուզական ծառայությունները նշում են, որ ահաբեկչուհու տեղափոխման համար ԻՊ-ի զինյալները պետք է որ մեծ գումարներ վճարած լինեն, քանի որ գործողությունը կարող էր վտանգավոր լինել: The Mirror ամսագիրը հայտնում է, որ հատուկ ծառայությունները հեռախոսային բանակցությունների և տեսանկարահանման ձայնագրություններ ունեն Ստամբուլի օդանավակայանից:

Նշենք, որ ավելի վաղ թուրքական իշխանությունները հայտարարել էին, որ Հայաթ Բումեդյենը գտնվում է Սիրիայում: Այս մասին Anadolu գործակալությունն ասել էր Թուրքիայի ԱԳՆ ղեկավար Մևլութ Չավուշօղլուն: Նա նաև ընդունել էր, որ ահաբեկչուհին ապօրինի ճանապարհով Սիրիա է անցել Թուրքիայի տարածքով:

Եվ սա այն դեպքում, երբ թուրք պաշտոնական գործիչներն ամեն անգամ հայտարարում են, որ թուրքական իրավապահ մարմիններն ամեն ինչ անում են՝ Թուրքիայի տարածքով ահաբեկիչների մուտքը Սիրիա կասեցնելու համար: Սա հերթական ապացույցն է, որ Թուրքիան անուղղակիորեն ներգրավված է ոչ միայն մերձավորարևելյան տարածաշրջանում, այլ նաև Եվրոպայում իրականացվող ահաբեկչություններում: