ԵՄ-ն քննարկել է Թուրքիայի առաջընթացի զեկույցը

• 23.01.2015, 11:50
•  Եվրոպա,  Տարածաշրջան,  Աշխարհ

Թուրքիայի անդամակցության գործընթացի հարցով Եվրոպական Միության զեկուցողը ներկայացրել է երկրի գրանցած առաջընթացն ու ետընթացը:

ԵՄ-ի Թուրքիայի հարցով նորանշանակ զեկուցող սոցիալ-դեմկորատական կուսակցության ներկայացուցիչ Քեթի Պիրին, Եվրոպական Խորհրդարանում ներկայացնելով իր կողմից պատրաստված Թուրքիայի առաջընթացի զեկույցը, հայտնել է, որ Թուրքիան չի համապատասխանում ԵՄ-ին անդամակցող երկրի չափանիշներին՝ խոսքի ազատության և անկախ դատական համակարգի բացակայության պատճառով: Ըստ այդմ, նա նշել է դատական համակարգին և մարդու հիմնարար ազատություններին վերաբերող բանակցային փաթեթի գլուխների բացելու անհրաժեշտությունը: Գլուխների քննարկումների մեկնարկով՝ երկրում անհապաղ բարեփոխումներ կիրականացվեն: Պիրին նշել է, որ 23-րդ և 24-րդ բանակցային գլուխների բացումը մեծ դեր ունի Թուրքիայի՝ ԵՄ-ին անդամակցության հարցում:

Զեկույցը Թուրքիայի կառավարության հասցեին քննադատություն է հնչեցնում՝ դեկտեմբերի կեսերին ԶԼՄ մոտ 30 ներկայացուցիչների ձերբակալությունների համար:

Առաջընթացի զեկույցում անդրադարձ է կատարվել նաև այլ բանակցային գլուխների, ինչպիսիք են՝ տնտեսական և արժութային քաղաքականությանը, մրցակցային, սոցիալական քաղաքականությունն ու աշխատաշուկային, արտաքին, անվտանգության և պաշտպանության քաղաքականություններին վերաբերող  գլուխների պահանջների իրականացման հարցում առաջխաղացման անհրաժեշտությանը:

Զեկույցը կոչ է արել փոխանակման ծրագրերի մասնակից ուսանողների և գիտության ոլորտի ներկայացուցիչ Թուրքիայի քաղաքացիների համար ԵՄ վիզայի ռեժիմն ազատականացնել:

Զեկույցում նաև ասվում է, որ «Թուրքիայում քրդական հարցի լուծումը կնպաստի երկրում մարդու իրավունքների կայունացմանն ու դրանց պաշտպանությանը»:

Նշենք նաև, որ Խորհրդարանական քննարկումների ընթացքում Սոցիալ-դեմոկրատները կոչ են արել Խորհրդին և Եվրոպական հանձնաժողովին նորովի վերսկսել Թուրքիայի ԵՄ անդամակցության բանակցությունները: Միևնույն ժամանակ նրանք դիմել են Թուրքիայի իշխանություններին՝ կոչ անելով  արագացնել Կոպենհագենյան չափանիշներին համապատասխանությանն ուղղված բարեփոխումների իրականացումը:

 Թուրքիայի ԵՄ-ին անդամակցության բանակցային փաթեթի 35 գլխից  14-ը բացվել են և քննարկման փուլում են, իսկ 17-ը մնում են սառեցված ԵՄ անդամ երկրների կողմից: Վերջինները ներառում են տնտեսական և արժութային հարցերին վերաբերող 17-րդ գլուխը և կրթության և մշակույթային հարցերին վերաբերող 26 գլուխը: