Ադրբեջանը չի կարողանում հասնել իր առջև դրված նպատակներին. Ա. Կարապետյան

• 30.01.2015, 12:14
•  Եվրոպա,  ԵԱՏՄ,  Տարածաշրջան,  «Հայացք» վերլուծական կենտրոն,  Աշխարհ,  Հայաստան

«Հայացք» կիրառական քաղաքականության և հետազոտությունների վերլուծական կենտրոնի փորձագետ Աննա Կարապետյանը, մեկնաբանելով տարեսկզբին սահմաններին տիրող լարված իրավիճակը,  լրագրողների հետ զրույցի ժամանակ առանձնացրեց այն հիմնական արտաքին գործոնները, որոնք  չէին կարող չազդել սահմաններին տիրող ներկայիս իրավիճակի վրա:

Որպես առաջին գործոն՝ փորձագետն առանձնացրեց Արևմուտք-ՌԴ ներկայիս լարված հարաբերությունները, որոնք ըստ Ա. Կարապետյանի՝ Ադրբեջանի կողմից  ընկալվում են որպես հնարավորություն՝ տարածաշրջանում ամրապնդելու իր դիրքերը.

«ԵՄ-ի էներգետիկ աղբյուրները դիվերսիֆիկացնելու ցանկության համատեքստում  աճել է Ադրբեջանի էներգետիկ ռեսուրսների նշանակությունը  ԵՄ-ի համար, ինչը ադրբեջանական կողմն  ընկալում է որպես հնարավորություն «փակել Եվրոպայի աչքերը» և իրականացնել իր շահերին ի նպաստ գործողություններ»:  Բացի այդ, փորձագետի խոսքերով, միջազգային հանրության  ուշադրությունն այսօր սևեռված է ուկրաինական ճգնաժամի վրա, և սա նույնպես Ադրբեջանը փորձում է օգտագործել: 

Մյուս կարևոր գործոնը Հայաստանի անդամակցություն է ԵԱՏՄ-ին, որտեղ ըստ փորձագետի՝ Ադրբեջանը այդպես էլ չկարողացավ իրացնել իր ակնկալիքները և հիմա նման  գործողություններով փորձում է «վրեժ լուծել» իր՝ այդպես էլ չստացած դիվիդենտների համար:

Այս հիմնական արտաքին գործոններն առանձնացնելուց զատ, Ա. Կարապետյանը,  անդրադարձավ նաև նրան, թե ինչ ունենք մենք հիմա  տարեսկզբին սահմաններին տիրող լարված իրավիճակի հետևանքով: Ըստ Ա. Կարապետյանի՝ դրա արդյունքը եղավ այն, որ կողմերի միջև վստահության մթնոլորտը հասավ զրոյի:  Փորձագետը նկատեց, որ այստեղ իրենց մեղքի բաժինն ունեն թե՛ կողմերը և թե՛ միջազգային հանրությունը:

«Սահմանին արձանագրվող միջադեպերին միջազգային հանրության արձագանքը որպես կանոն միշտ լինում է ոչ հասցեագրված: ԵԱՀԿ համանախագահների վերջին համատեղ հայտարարությունը, որը թեպետ տարբերվում էր համանախագահների նախորդ հայտարարություններից, քանի որ տարանջատում էր կողմերին ուղղված իր կոչերը, այնուամենայնիվ դա արժանի արձագանքը չէր ներկայիս Ադրբեջանի ագրեսիվ պահվածքին:  Բացի այդ, հայտարարությունն ինքնին ուշացած էր, քանի որ պետք է արվեր ոչ թե հանդիպման ժամանակ, այլ սահմանին տեղի ունեցող միջադեպերից անմիջապես հետո, եթե իսկապես նպատակ ուներ կանխել սահմանին զարգացող լարվածությունը»::

Ամփոփելով իր խոսքը՝ փորձագետը անդրադարձավ բանակցային սեղանին ներկայումս դրված Մադրիդյան սկզբունքներին, նշելով որ դրանք ներկայիս բանակցային փուլում  կենսունակ չեն, այսօր հնարավոր չէ խոսել զիջումների մասին.

«Ներկայումս առաջնայինն արդեն կողմերի միջև վստահության մթնոլորտի վերականգնում է, որի բացակայության պայմաններում փոխզիջումների մասին խոսելը անիմաստ է: Ամփոփելով մնում է միայն նշել, որ չնայած լարվածություն ստեղծելով դիվիդենտներ քաղելու Ադրբեջանի ձգտմանը, ԼՂՀ արտգործնախարարի ամփոփիչ ասուլիսը  ցույց տվեց , որ միևնույն է հայկական ուժերը մնում են կոնսոլիդացված և   2015 թվականի գերակայությունների մեջ  ԼՂՀ շարունակում է պահպանել միջազգային ճանաչման, ինչպես նաև հակամարտության խաղաղ կարգավորման իր ձգտումները: Այս առումով կարելի է ասել, որ Ադրբեջանն այդպես էլ  չի կարողանում հասնել իր առջև դրված նպատակներին» ,- ամփոփեց Ա. Կարապետյանը: