Հնդկաստանում սպասվում է տնտեսական աճ

• 11.03.2015, 12:14
•  Ասիա,  Աշխարհ

Վերջին տվյալներից և ընթացիկ միտումներից դատելով, Հնդկաստանը շուտով կդառնա նաև աշխարհում ամենաարագ աճող տնտեսությունը, հաղորդում է bankist.ru-ն: Դրա մասին են վկայում Բոմբեյի, Շանհայի, Ինդոնեզիայի և Ֆիլիպինների ֆոնդային բորսաները:

Հնդկաստանի ռեֆորմիստական կառավարությունը, դրական ժողովրդագրական վիճակը, Կենտրոնական բանկի հեղինակության վերականգնումը և նավթի ցածր գնի տեսքով հսկայական հաջողությունը` այս բոլոր գործոնները կարող են նպաստել երկրի տնտեսական աճին:

Հնդկաստանը պետք է առաջընթացի հասնի միանգամից չորս հատվածում. 1. աշխատանք այն միլիոնավոր մարդկանց համար, որոնք այլևս չեն ցանկանում քաղաքներից դուրս ապրել, 2. ոչ արդյունավետ հարկային համակարգի բարեփոխում, 3. ենթակառուցվածքի զարգացում, 4. բյուջեի դեֆիցիտի կարգավորում:

Ճիշտ մոտեցման դեպքում վերլուծաբանները խոստանում են, որ արդեն 1-2 տարի անց Հնդկաստանի տնտեսական աճը կլինի 8%-ից ոչ պակաս:

Բյուջեի դեֆիցիտի կարգավորման հարցում, բացի բարեփոխումներից, մեծ օգնություն էր նաև նավթի գնի նվազումը: Իսկ ինչ վերաբերում է աշխատունակ բնակչությանը, ապա այս առումով Հնդկաստանը խնդիր չունի, ինչպես Չինաստանն ու Ճապոնիան, որոնք ունեն ծերացող բնակչություն: Իսկ ենթակառուցվածքի զարգացման համար Հնդկաստնն արդեն փնտրում է միջազգային ներդրումներ, ինչպես նաև բյուջեից լուրջ գումարներ է հատկացնում: