Թբիլիսիում «թաղել» են ազգային արժույթը

• 30.03.2015, 11:15
•  Տարածաշրջան,  Աշխարհ

Վրացական մի քանի ոչ պետական կազմակերպություններ Թբիլիսիում կազմակերպել են արժեզրկված ազգային արժույթի՝ լարիի, խորհրդանշական թաղումը: «Սգում ենք լարիին» անվանումը կրող ակցիան տեղի է ունեցել նախկին վարչապետ Բիձինա Իվանիշվիլիի տան մոտ:

Ըստ միջոցառման կազմակերպիչներից մեկի՝ «Ապրիորի» հասարակական կազմակերպության ներկայացուցիչ Բեսո Շենգելիայի, մի քանի կազմակերպությունների ներգրավմամբ ակցիան կազմակերպվել է Facebook սոցիալական ցանցի  միջոցով:

«20 տարվա կյանքից և 2 տարվա ծանր հիվանդությունից հետո լարին մահացավ: Մենք եկել ենք այստեղ, որպեսզի նախկին վարչապետին ասենք, որ նա խաբում է ժողովրդին»,- հայտարարել է Շենգելիան:

Ակցիայի մասնակիցները պատրաստել էին դագաղ, որը լցված էր լարիի տեսք և Իվանիշվիլիի պատկերն ունեցող թղթերով: «Թաղման» ընթացքում մասնակիցները սգացել են լարիի մահը՝ ստեղծված իրավիճակի համար մեղադրելով գործող իշխանություններին: Ցուցադրական միջոցառումը տևել է 10-15 րոպե:

Հիշեցնենք, որ 2014թ-ի նոյեմբերից լարին դոլարի համեմատ արժեզրկվել է 26.8%-ով և ըստ Վրաստանի Ազգային բանկի մարտի 29-ի տվյալների՝ մեկ դոլարն արժե 2.2242 լարի: