Բելգիայի խորհրդարանի հանձնաժողովը Հայոց ցեղասպանության վերաբերյալ բանաձև է ընդունել

• 07.07.2015, 15:49
•  Եվրոպա,  Հայաստան

Բելգիայի խորհրդարանի արտաքին հարաբերությունների հանձնաժողովն այսօր՝ հուլիսի 7-ին, իր նիստում Հայոց ցեղասպանության վերաբերյալ բանաձև է ընդունել: Այս մասին հայտնում է news.am-ը՝ հղում կատարելով «Հանուն արդարության և ժողովրդավարության» Եվրոպական հայկական ֆեդերացիային:

Ընդունվել է խորհրդարանական մեծամասնության ներկայացրած բանաձևը:

Քննարկումներից հետո մեծամասնության անդամների մասնակցությամբ տեքստն ընդունվել է, բայց ոչ միաձայն: Սոցիալիստական կուսակցությունը, «Մարդասիրական ժողովրդավարական կենտրոն» կուսակցությունը և «Էկոլո»-ն ձեռնպահ են քվեարկել:

Ընդդիմության առաջարկած փոփոխությունները իշխող մեծամասնությունը մերժել է:

Խորհրդարանական մեծամասնությունը իր նախագիծն է ներկայացրել արտահերթ քննարկման, որը ցանկանում է, որ բանաձևը խորհրդարանն  ընդունի  նախքան ամառային արձակուրդները՝ հուլիսի 21-23-ին:

Սակայն բանաձևի իրենց նախագծերն են ներկայացրել նաև «Մարդասիրական ժողովրդավարական կենտրոն» կուսակցությունը, Սոցիալիստական կուսակցությունը և «Ֆլամանդական շահ» կուսակցությունը:

Նշենք, որ Բելգիայի վարչապետ Շառլ Միշելը հունիսի 18-ին երկրի Ներկայացուցիչների պալատում իր կառավարության անունից ճանաչել է  Հայոց ցեղասպանությունը: «Ես կարծում եմ, որ 1915-1917 թվականների ողբերգական իրադարձությունները, որոնք նախաձեռնել էր Օսմանյան Կայսրության վերջին կառավարությունը, պետք է որոկվեն որպես ցեղասպանությունը»,-ասել էր Շառլ Միշելը:

Հիշեցնենք, որ Բելգիայի Սենատը հատուկ բանաձևով Հայոց ցեղասպանությունը ճանաչել է 1998 թվականին: