Ադրբեջանն անցնում է «25 դոլարանոց» բյուջեի

• 02.02.2016, 15:18
•  Աշխարհ

Ադրբեջանական ԶԼՄ-ները հայտնում են, որ երկրի ֆինանսների նախարար Սամիր Շարիֆովն Ալիևի հաստատմանն է ներկայացրել մեկ բարելի դիմաց 25 դոլար նավթի գնով վերահաշվարկված բյուջեն: Հիշեցնենք, որ ընթացիկ տարվա համար ադրբեջանական բյուջեի եկամուտները հաշվարկված էին մեկ բարելի դիմաց 50 դոլար գնային պայմանների համար, մինչդեռ իրավիճակն այս պահին հեռու է «հիսուն դոլարային» լինելուց:

Կրկնակի անգամ էժան նավթի գներով բյուջեի վերահաշվարկը բնականաբար ենթադրում է բյուջետային եկամուտների հոդվածի կրկնակի անկում: Շարունակելով տրամաբանական շղթան՝ նշենք, որ սա իր հերթին ենթադրում է նաև ծախսերի կրճատում, սակայն այս դեպքում կրճատումը կգերազանցի կրկնակի շեմը: Պատճառը ծախսերի ու եկամուտների ոչ բացարձակ համամասնության մեջ է, որն առավել արտահայտված կդրսևորվի  Ադրբեջանի նման անազատ տնտեսությունում:

Ադրբեջանի բյուջեի վերահաշվարկով մեծանում է նաև այդ երկրի սոցիալական բեռը: Մինչդեռ անհասկանալի տարամաբանությամբ Ալիևը շարունակում է իրականությանը ոչ ադեկվատ քաղաքականության իրականացումը: Մասնավորապես խոսքը վերաբերում է նախորդ շաբաթվա ընթացքում մի շարք ոլորտներում աշխատավարձերի բարձրացման մասին, ինչը լավագույն դեպքում մի փոքր կմեղմի երկրում ստեղծված լարվածությունը, մինչդեռ իրավիճակի սոցիալական դժգոհությունների ալիքն, առավել ևս նոր հաշվարկված բյուջեով դժվար թե Ալիևը կարողանա երկար ժամանակ զսպել:

Ընթացիկ տարվա համար սոցիալական բախումներից Ալևին  խուսափել չի հաջողվի անգամ Հայաստանի և Արցախի հետ սահմաններին լարվածության մեծացման և սեփական զինվորների զոհաբերության միջոցով: Մեծ հաշվով այս քաղաքականության նկատմամբ ադրբեջանական հասարակությունն արդեն ունի որոշակի իմունիտետ, ինչի մասին կարելի է ենթադրել այդ երկրում տեղի ունեցած հունվարյան բողոքի ցույցերով:

Սոցիալական լարվածությունը մեղմելու նպատակով  Ալիևը թերևս պետք է առավել անկեղծ լինի իր բնակչության հետ և չշարունակիլ հերքել այն փաստը, որ ադրբեջանական իշխանությունները ֆինանսական օժանդակության խնդրանքով դիմել են ԱՄՀ-ի ու ՀԲ-ին՝ երկիրը դեֆոլտից փրկելու նպատակով: Այլ խնդիր է այն, որ բանակցություններն այդ կառույցների հետ առայժմ չեն պսակվում հաջողությամբ, ինչն Ալիևի վարչակազմի կողմից ներկայացվում է՝ որպես առհասարակ նմանատիպ գործընթացի բացակայություն:

Ամեն դեպքում եկող տարին ադրբեջանական հանրության համար բավական բարդ տարի է լինելու: Բյուջեի եկամուտների կրկնակի նվազման բացասական հետևանքները հնարավոր չի լինի կոծկել ո՛չ աշխատավարձերի մասնակի բարձրացումներով, ո՛չ էլ առավել ևս Ալիևի պատրանքներով: