Ուկրաինան քաղաքական նոր ճգնաժամի նախաշեմին

• 16.02.2016, 18:06
•  Եվրոպա,  Աշխարհ

discred.ru

Ուկրաինայի Գերագույն Ռադայում «Պյոտոր Պորոշենկոյի բլոկի» խմբակցությունը վարչապետ Արսենի Յացենյուկի աշխատանքը որակել է անբավարար և ստորագրահավաք է սկսել նախարարների կաբինետին անվստահություն հայտնելու համար, տեղեկացնում է  Интерфакс-ը: Բավարար քանակությամբ ստորագրություններ հավաքելու դեպքում այդ հարցը կդրվի քվեարկության Ռադայում:

Ավելի վաղ ուկրաինական լրատվամիջոցները «Պյոտոր Պորոշենկոյի բլոկի» անանուն աղբյուրին հղումով գրում էին, որ նախագահը որոշել է պաշտոնաթող անել վարչապետին: «Նա (Պորոշենկոն) հիմա մտածում է, թե ով է լինելու նրանից (Յացենյուկից) հետո: Հենց գտնվի թեկնածու, հրաժարականը կկայնա», - հայտնել էր աղբյուրը:

Նշենք, որ նախաձեռնության հաջողության համար անհրաժեշտ է 150 ստորագրություն, որից արդեն հաջողվել է հավաքվել 79-ը: Բացի «Պորոշենկոյի բլոկից» վարչապետի հրաժարականի օգտին հանդես են եկել նաև Յուլիա Տեմոշենկոյի «Բատկիվշինա» կուսակցության և «Օլեգ Լյաշկոյի ռադիկալ կուսակցության» խմբակցությունները: Ինչպես պնդում է Օդեսայի նահանգապետ Միխայիլ Սահակաշվիլին, նույնիսկ Յացենյուկի «Ազգային ճակատ» կուսակցության որոշ անդամներ ևս կողմ են իրենց առաջնորդի հրաժարականին:

Նշենք, որ կառավարության փոփոխության հարցն առաջացավ այն բանից հետո, երբ փետրվարի սկզբին տնտեսական զարգացման և էկոնոմիկայի նախարարը հայտարարեց իր հրաժարականի մասին՝ պատճառաբանելով երկրի տնտեսությունում կոռուպցիոն սխեմաների առկայությամբ և քաղաքական ճնշումների պատճառով բարեփոխումներ իրականացնելու անհնարինությամբ: Նախարարի մեղադրանքն ավելի շատ ուղղված էր նախագահի շրջապատին:

Հատկանշական է, որ Ուկրաինան դեռևս տնտեսական լուրջ ճգնաժամ է ապրում: Նախորդ տարի երկրին հաջողվեց խուսափել դեֆոլտից Արժույթի միջազգային հիմնադրամի տրամադրած ֆինանսավորման շնորհիվ: Իշխանություններին նախորդ տարվա ընթացքում չհաջողվեց վերականգնել երկրի՝ զինված հակամարտությունից հյուծված տնտեսությունը: 2015 թվականին Ուկրաինայի ՀՆԱ-ն անկում է ակրպես 10.5 տոկոսով, իսկ արդյունաբերության ծավալը՝ 13,4 տոկոսով: Ազգային արժույթն արժեզրկվել 52.2 տոկոսով, իսկ ինֆլյացիայի մակարդակը կազմում է 45 տոկոս:

Այս տարին ևս ուկրաինական տնտեսությունը սկսել է բոլոր ցուցիչների անկմամբ: Միջին աշխատավարձի չափով Ուկրաինան Եվրոպայում վերջին հորիզոնականն է զբաղեցնում՝ Բելառուսից և Մոլդովայից հետո:

Իհարկե, նման պայմաններում կառավարության հրաժարականը միանգամայն սպասելի էր: Սակայն, հարկ է նշել, որ այդ հրաժարականը Ուկրաինային կարող է հանգեցնել քաղաքական նոր ճգնաժամի՝ էլ ավելի բարդացնելով երկրի տնտեսական իրավիճակը: