Սարգսյան-Ալիև հանդիպում. արձագանքներ Ստեփանակերտից

• 17.05.2016, 22:26
•  Տարածաշրջան,  Աշխարհ,  Հայաստան,  ԼՂՀ

Վիեննայում կայացած Սարգսյան-Ալիև հանդիպումից Ստեփանակերտում անկնկալում են  լարվածության որոշակի թուլացում: «Լրատվամիջոցներում տեղ գտած տեղեկատվությունից կարելի է որոշակի առաջընթաց ակնկալել մոտակա ժամանակներում: Սակայն սա չպետք է ոգևորի մեզ և մոռացության տա այն հիմնական խնդիրները, որոնք ծառացած են մեր առջև», - այս մասին «Արմեդիա» ՏՎԳ հետ զրույցում նշել է Լեռնային Ղարաբաղի Հանրապետության Ազգային ժողովի պատգամավոր Դավիթ Իշխանյանը: «Մենք անցած տարիների ընթացքում ականատես ենք եղել, թե ինչպես է Ադրբեջանը մի բան խոստանում, այլ բան անում՝ միանգամայն հակառակ իր տված խոստումներին», - ընդգծել է պատգամավորը: Նրա խոսքերով՝ չնայած լարվածության թուլացման ակնկալիքներին՝ պետք է առկա ողջ ներուժը դնել ԼՂՀ առջև ծառացած անվտանգության խնդիրները լուծելու համար, քանի որ Վիեննայի հանդիպման ընթացքում որևէ խոսք չկար ծանր հրետանու հետքաշման, դիպուկահարների հեռացման և պաշտպանական գծի հետ կապված մի շարք այլ հարցերի մասին:

Սարգսյան-Ալիև հանդիպումից Ղարաբաղի նկատմամբ Ադրբեջանի ապրիլյան ագրեսիայի հետևանքով առաջացած լարվածության թուլացման առումով առանձնակի սպասելիքներ չունեն նաև Արցախի փորձագիտական շրջանականերում: «Այն ժամանակ, երբ նրանք բանակցություններ էին անցկացնում Վիեննայում, մեր դիրքերը ամբողջ գիշեր ենթարկվել են հրետանակոծության, մենք ունենք զոհ: Ինչպես կարելի է հավատալ Ալիևի խոսքերին, նա երբեք չի կատարում իր խոստումները», - «Արմեդիա»-ի հետ զրույցում նշել է փորձագետ Ժաննա Կրիկորովան: Միևնույն ժամանակ նա ընդգծել է, որ Վիեննայի հանդիպման մասնակից միջազգային դերակատարներից ոչ մեկը ձեռք բերված պայմանավորվածությունների խախտման դեպքում պատասխանատվություն չի ստանձնում: