Էրդողանն ամեն ինչի համար արդարացում ունի

• 09.11.2016, 22:26
•  Տարածաշրջան,  Մերձավոր Արևելք,  Աշխարհ

Reuters

Թուրքիայում ընդդիմադիր քրդամետ Ժողովուրդների դեմոկրատական կուսակցության պատգամավորների և համանախագահների ձերբակալությունը սպառնում է վերածվել լուրջ քաղաքական ճգնաժամի: Նույնիսկ Թուրքիայի համար, որտեղ հատկապես հեղաշրջման անհաջող փորձից հետո, բռնաճնշումները և քաղաքական հալածանքները  միանգամայն սովորական են դարձել, պատգամավորների ձերբակալությունն ուղղակի աննախադեպ է: Այսպես, երկրի գլխավոր ընդդիմադիր Ժողովրդա-հանրապետական կուսակցությունը ԺԴԿ պատգամավորների ձերբակալությունը հայտարարել է հակասահմանադրական, ինչն առաջացրել է Անկարայի զայրույթը:

«Նրանք դեռ կվճարեն սրա համար», - այս կապակցությամբ հայտարարել է Թուրքիայի նախագահ Ռեջեփ Թայիփ էրդողանը՝ հավելելով, որ ոչ մի կուսակցության hարիր չէ նման հայտարարություններով հարձակում գործել երկրի նախագահի և կառավարության վրա:   

Անկարայի պնդմամբ՝ պատգամավորների ձերբակալությունը միանգամայն սահմանադրական է՝ հաշվի առնելով Թուրքիայում ընդունված սահմանադրական փոփոխությունը, որով նախատեսվում է անձեռնմխելիությունից զրկել այն պատգամավորներին, որոնց գործով դատական մարմինների կողմից հետաքննություն է անցկացվում:

Նշենք, որ դեռևս այն ժամանակ միանգամայն ակնհայտ էր, որ Էրդողանի պնդմամբ ընդունված փոփոխությունն ուղղված է քրդամետ կուսակցության պատգամավորների դեմ: Թուրքական իշխանությունները բազմիցս մեղադրել են Ժողովուրդների դեմոկրատիա կուսակցությանը Թուրքիայիում ահաբեկչական համարվող Քրդստանի աշխատավորական կուսակցության հետ կապի մեջ: Օգոստոսի թուրքական դատախազությունը հայտարարեց, որ պատրաստ է ԺԴԿ համանախագահ, Էրդողանի գլխավոր ընդդիմախոսներից Սալահեթթին Դեմիրթաշի դեմ քրեական գործ հարուցել ահաբեկչական կազմակերպությունների քարոզչության համար. քրեական գործը մասնավորապես կապված է 2013 թվականին Քրդստանի աշխատավորական կուսակցության առաջնորդ Աբդուլլա Օջալանի օգտին Դեմիրթաշի ելույթների հետ:

Այսպիսով, քուրդ պատգամավորների ձերբակալելու Էրդողանի վիճելի քայլը ունի միանգամայն սահմանադրական հիմքեր, միանգամայն այլ հարց է մեղադրանքի արդարացիությունը: Այս առումով նշենք, որ էրդողանը բազմիցս հայտարարել է, որ «Թուրքիայում չկա «քրդական հարց», կա ահաբեկչության խնդիր», և այս համատեքստում քրդերի շահերի պաշտպանությունը թուրքական իշխանությունների կողմից կարող է ներկայացվել որպես ահաբեկչության քարոզչություն: 

Նշենք, որ քուրդ պատգամավորների ձերբակալությամբ Էրդողանը միանգամից լուծում է երկու խնդիր. քրդերի ձայներն այլևս լսելի չեն դառնում, միևնույն ժամանակ վերացվում է Էրդողանի թիվ մեկ խնդրի՝ երկրի նախագահական կառավարման ձևի անցնելու ճանապարհին ևս մեկ խոչընդոտ՝ խորհրդարանում ներկայությունից դրա դեմ հանդես եկող քրդական կուսակցության պատգամավորներին զրկելով: