Սիրիական հակամարտության կարգավորման հեռանկարն առաջիկայում. փորձագետներ

• 21.12.2016, 18:48
• Արփինե Հովսեփյան
•  Մերձավոր Արևելք,  Աշխարհ

Սիրիական հակամարտության կարգավորման գործընթացում զգալի դրական միտումներ կան՝ հաշվի առնելով նախկինում հակոտնյա տեսակետներ ունեցող պետությունների`  Թուրքիա-Ռուսաստան, Իրան-Թուրքիա, ԱՄՆ-Ռուսաստան nերկա մերձեցումը: Այս մասին «Նովոստի-Արմենիա» մամուլի կենտրոնում տեղի ունեցած ասուլիսի ժամանակ նշել է Պատմական գիտությունների թեկնածու, Արևելագիտության ինստիտուտի գիտաշխատող, ԵՊՀ դոցենտ, արաբագետ Արաքս Փաշայանը: 

«Նույն Հալեպի ազատագրումը միջազգային պայմանավորվածությունների արդյունք էր: Հստակ է, որ առկա է ռուս-թուրքական համագործակցություն Սիրիայում, և Ռուսաստանի դեսպանի սպանության վրա աչք փակելը մեկ անգամ ևս ապացուցում է, որ հստակ փոխգործակցություն կա», - ասել է արաբագետը:

«Սա նշանակում է, որ հնարավոր են դրական տեղաշարժեր: Իհարկե, դա չի կարող տեղի ունենալ անմիջապես, որովհետև ներգրավված կողմերը շատ են, և բոլորն էլ ունեն իրենց հետաքրքրությունները և շահերը, և եթե ինչ-որ ձևով չբավարարվեն նրանց հետաքրքությունները, նրանք դժվար թե հեռանան Սիրիայից», - ասել է Փաշայանը:

Իր հերթին, «Հայացք» կիրառական քաղաքականության և հետազոտությունների վերլուծական կենտրոնի փորձագետ Արփինե Հովսեփյանն, անդրադառնալով սիրիական հակամարտության կարգավորման հնարավորությանը, նշել է, որ  «սիրիական հակամարտությունը մեկ կամ երկու տարում կարգավորել չի հաջողվի, քանի որ խնդիրները բազմաշերտ են, և դրանց կարգավորումը ժամանակ է պահանջելու»: 

«Սիրիայում, ինչպես նաև առավել լայն իմաստով մերձավորարևելյան տարածաշրջանում ընթացող գործընթացներն ապացուցում են, որ համակարգված, ավելին՝ համակողմանի և համապարփակ մոտեցման կարիք կա: Չի բացառվում, որ խնդրի լուծման բանալին տարածաշրջանային ճգնաժամերի միասնական դիտարկման և համակողմանի կարգավորման մեջ է: Կարգավորման այնպիսի տարբերակ է անհրաժեշտ, որը կկարողանա կայունություն հաստատել ոչ միայն մեկ երկրում, ինչն ինքնին անհնար է համատարած քաոսի պայմաններում, այլ ողջ տարածաշրջանում», - նշել է փորձագետը: