«ОК Армения». Հայաստանի և Ռուսաստանի զբոսաշրջության կապերը խորացնող միջոցառում` նվիրված Հայաստանի և Արցախի զբոսաշրջային գրավչություններին

• 19.10.2017, 17:36
•  ԵԱՏՄ,  Տարածաշրջան,  Հայաստան,  ԼՂՀ

Aysor.am

Հոկտեմբերի 12-ին Ռուսաստանում Սանկտ Պետերբուրգի «Լոտե Պլազա» հյուրանոցի հանդիսավոր դահլիճներից մեկում ՀՀ դեսպանատան և Սանկտ Պետերբուրգում ՀՀ գլխավոր հյուպատոսության կողմից կազմակերպվեց «ОК Армения» խորագրով միջոցառում-շնորհանդես՝ նվիրված Հայաստանի և Արցախի զբոսաշրջային գրավչություններին:

Արցախպրեսի փոխանցմամբ շնորհանդեսին ներկա էին Սանկտ Պետերբուրգում պաշտոնական այցով գտնվող ՀՀ ԱԺ նախագահ Արա Բաբլոյանը, Ռուսաստանում ՀՀ արտակարգ և լիազոր դեսպան Վարդան Տողանյանը, Սանկտ Պետերբուրգում ՀՀ գլխավոր հյուպատոս Հրայր Կարապետյանը, Սանկտ Պետերբուրգում ՌԴ ԱԳՆ ներկայացուցիչ Վլադիմիր Զապեվալովը, Սանկտ Պետերբուրգի Կառավարության արտաքին կապերի կոմիտեի ղեկավար Եվգենի Գրիգորևը, Սանկտ Պետերբուրգի զբոսաշրջության կոմիտեի ղեկավարի տեղակալ Նանա Գվիչիան, Սանկտ Պետերբուրգի շուրջ 90 զբոսաշրջային կազմակերպությունների, հյուրանոցային համալիրների և զբոսաշրջային տեղեկատվական գործակալությունների  ներկայացուցիչներ, Սանկտ Պետերբուրգում հավատարմագրված դիվանագետներ, և այլք:

Միջոցառմանը բացման խոսքով հանդես եկավ ՌԴ-ում  ՀՀ  արտակարգ և լիազոր դեսպան Վարդան Տողանյանը: Ողջունելով ներկաներին՝ դեսպանը նշեց, որ նմանատիպ միջոցառումներն ավելի են խորացնում Հայաստանի և Ռուսաստանի միջև զբոսաշրջության կապերը, և  հնարավորություն տալիս տվյալ դեպքում ՌԴ Հյուսիսային մայրաքաղաքի զբոսաշրջության ոլորտի խոշորագույն կազմակերպություններին ավելի մանրամասն ծանոթանալու Հայաստանի և Արցախի զբոսաշրջության ոլորտին և պատմամշակութային արժեքներին:

Ողջ երեկոյի ընթացքում հյուրերը հնարավորություն ունեցան ունկնդրել հայկական երաժշտությունն ու պարը, համտեսել հայկական ուտեստներ և խմիչքներ:  

Այնուհետև, տեղի ունեցավ նկարչական վարպետության դաս, որի ընթացքում հյուրերին հնարավորություն ընձեռնվեց նկարել և իրենց հետ վերցնել Մարտիրոս Սարյանի «Գեղամա սարեր» նկարի արտանկարը: