ԵՐԵՎԱՆ 16 C°
ՀՀ ԿԲ -
  • USD - 483.94 դրամ +0,94 EUR - 512.2 դրամ +0,2 RUB - 7.88 դրամ +0,88 GBP - 595.54 դրամ +0,54
  • ՈՍԿԻ - 26 965,67 դրամ ԱՐԾԱԹ - 264,44 դրամ ՊԼԱՏԻՆ - 12 988,57 դրամ

Կաթողիկոսը Գվատեմալայի Կոնգրեսի փոխնախագահին լուսաբանություններ է տվել Ղարաբաղյան հակամարտության վերաբերյալ

Դեկտեմբերի 6-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է Գվատեմալայի Հանրապետության Կոնգրեսի առաջին փոխնախագահ Ֆելիպե Ալեխոս Լորենզանայի գլխավորած պատվիրակությանը` ուղեկցությամբ ՀՀ ԱԺ փոխնախագահ Լենա Նազարյանի:

Զրույցի ընթացքում Վեհափառ Հայրապետն ուրախություն է հայտնել Հայաստանի և Գվատեմալայի Հանրապետությունների միջև գործակցային կապերի հաստատմանն ուղղված առաջին քայլերի կապակցությամբ՝ այդ համատեքստում կարևորելով Գվատեմալայի Հանրապետության Կոնգրեսի և Հայաստանի Հանրապետության Ազգային ժողովի միջև բարեկամության և խորհրդարանական համագործակցության մասին համաձայնագրի ստորագրումը, որը նոր հորիզոններ պիտի բացի կապերի հաստատման և փոխհարաբերությունների ընդլայնման համար:

Խոսելով Մայր Աթոռ Սուրբ Էջմիածնի առաքելության, հայ ժողովրդի պատմության մեջ քրիստոնեության դերի մասին՝ Ամենայն Հայոց Կաթողիկոսն անդրադարձել է այն փորձություններին և մարտահրավերներին, որոնք դիմագրավել է հայ ժողովուրդը` պահպանելով իր ազգային ինքությունը և ուրույն դիմագիծը: Նորին Սրբությունը մասնավորապես պատվիրակության ուշադրությունն է հրավիրել Հայոց Ցեղասպանության դատապարտման կարևորությանը` մարդկային կյանքում նման ոճրագործությունների կանխարգելմանն ի նպաստ, ինչպես նաև լուսաբանություններ է տվել Լեռնային Ղարաբաղի հակամարտության և դրա խաղաղ հանգուցալուծման անհրաժեշտության վերաբերյալ: Վեհափառ Հայրապետը հույս է հայտնել, որ Գվատեմալայի իշխանությունները կարտահայտեն իրենց դիրքորոշումը հայ ժողովրդի համար կարևոր այս խնդիրների շուրջ:

Պրն. Ֆելիպե Ալեխոս Լորենզանան, շնորհակալություն հայտնելով ընդունելության համար, նշել է, որ այցելությունը Հայաստան կարևոր քայլ է երկու երկրների միջև հարաբերությունների հետագա զարգացման և փոխգործակցության համար: Փոխնախագահը նաև ներկայացրել է Գվատեմալայի Հանրապետությունում վերջին տարիներին տեղի ունեցած զարգացումները՝ կարևորելով փորձի փոխանակումը և Հայաստանի հետ հարաբերությունների հետագա ամրապնդումը:

Ադրադառնալով պատմության ողբերգական էջերին` նա նշել է, որ չպետք է մոռանալ անցյալը, քանի որ այն կրկնվելու հատկություն ունի, ապա կարևորեց տարբեր հարցերի շուրջ այցի ընթացքում ստացված լուսաբանությունները:

Վերջում Ամենայն Հայոց Հայրապետը բարի արդյունավորում է մաղթել երկու երկրների հարաբերությունների աշխուժացմանն ուղղված քայլերին:

 


Ամենաընթերցվածը

օրվա

շաբաթվա

ամսվա

Եղանակ
Երևան
Պարզ երկինք
Խոնավություն՝ 58%
Քամի՝ 6 կմ/ժ
16 C°
 
13°  26° 
27.05.2020
16°  28° 
28.05.2020
Հարցում

Բավարա՞ր եք համարում Հայաստանում կորոնավիրուսի համաճարակի տարածման դեմ ձեռնարկվող միջոցները: