Ունենք վարակի 3 աղբյուր, որոնցից 2-ն ամբողջությամբ վերահսկելի և սահմանափակված է. Արցախի պետնախարար

• 14.04.2020, 12:45
•  Տարածաշրջան,  Աշխարհ,  ԼՂՀ

Այս պահի դրությամբ իրավիճակը ամբողջությամբ վերահսկվում է. մենք ունենք վարակի 3 աղբյուր, որոնցից 2-ն ամբողջությամբ վերահսկելի և սահմանափակված է: Այս մասին, այսօր՝ ապրիլի 14-ին Արցախում նախագահական ընտրությունների քվեարկությանը մասնակցելուց հետո լրագրողների հետ զրույցում նշեց Արցախի պետնախարար Գրիգորի Մարտիրոսյանը, հայտնում է News.am-ը:

Ինչ վերաբերում է երրորդ աղբյուրի, նա ասաց. «Մյուս աղբյուրի վրա դեռ շարունակում ենք աշխատել, որովհետև թե վարակակիր անձի ընտանիքի անդամների շփումների առումով, թե ընդհանրապես, մի քիչ ավելի խոշոր բնակավայրերի առումով, վիճակը մի քիչ խնդրահարույց է: Բայց մենք շարունակում ենք աշխատել»:

Հարցին, թե չափազանց ռիսկային չէ՞ր այս պայմաններում ընտրությունների երկրորդ փուլ անցկացնելը՝ հաշվի առնելով, որ առաջին վարակակիրը ընտրություններին մասնակցել էր, որից հետո ամբողջ համայնքը մեկուսացվել է, պետնախարարը պատասխանեց. «Այո, առաջին վարակակիրը մասնակցել է ընտրություններին, բայց մեր տեղեկությունների համաձայն, այդ անձը եղել է դիմակով և ձեռնոցներով: Այս պահի դրությամբ այդ համայնքում և հարակից համայնքներում ընդամենը մեկ դեպք ունեցանք, որը առաջին վարակակրի ընտանիքի անդամն է»:

Նրա խոսքով, ռիսկայնությունը կարող ենք ինքներս գնահատել. «Նախ, պահպանված են բոլոր պայմանները և որևէ խնդիր չկա»:

Դիտարկմանը, թե հակասություն չկա՞, որ մի կողմից արտակարգ իրավիճակ է հայտարարվում, միաժամանակ ընտրություններ են անցկացվում, Գրիգորի Մարտիրոսյանն արձագանքեց. «Ընտրություններ անցկացնելու վերաբերյալ, կարծում եմ՝ ես չեմ հարցի հասցեատերը, բայց կպատասխանեմ: Ինչպես նշվել է երկրի նախագահի և այլ պաշտոնյաների կողմից, ընտրություններ անցկացնելը որևէ մեկի ցանկությամբ չի, այլ դա Սահմանադրության պահանջ է: Երկրի իշխանությունները, նախագահը նույնիսկ իրավասու չէ հետաձգելու ընտրությունները, կիրառելու այլ ռեժիմ»: