Մինչ այս գիշեր այդ բանվորները կպառկեն նույն հիվանդասենյակում, Էրդողանը կշարունակի վայելքն իր 1000 սենյականոց պալատում. Փայլան

• 11.05.2020, 19:27
•  Տարածաշրջան,  Աշխարհ

Թուրքիայի ընդդիմադիր քրդամետ «Ժողովուրդների դեմոկրատական կուսակցության» (ԺԴԿ-HDP) Դիարբեքիրից ընտրված հայ պատգամավոր Կարո Փայլանն անդրադարձել է Թուրքիայում կորոնավիրուսի իրական պատկերն արտացոլող նախագահ Ռեջեփ Թայիփ Էրդողանի և բանվորների լուսանկարին։

Ինչպես հայտնում է Ermenihaber-ը՝ այդ լուսանկարը սոցցանցերում և Թուրքիայի քաղաքական գործիչների շրջանում լայն քննարկումների առիթ է դարձել։ 

Նշենք, որ Թուրքիայում կորոնավիրուսի դեմ իրականացվող միջոցառումների շրջանակում Ստամբուլում 3 հիվանդանոց է կառուցվում, որոնցից մեկը Աթաթուրքի օդանավակայանի տարածքում։

Աշխատանքների ընթացքին ծանոթանալու համար Էրդողանն այցելել է շինարարներին։ Ինչպես երևում է լուսանկարում, Էրդողանը ձեռքով ողջունել է ժապավենից այն կողմ հավաքված շինարարներին, որոնց մեծ մասը չի պահպանել սոցիալական հեռավորությունը և չի կրել համավարակից պաշտպանվելու անհրաժեշտ միջոցները։ Մինչդեռ Էրդողանը նրանցից հեռու լինելու համար կանգնել է այդ բաժանարար գծի հակառակ կողմում։ 

Կարո Փայլանը Twitter միկրոբլոգի իր պաշտոնական էջում այդ լուսանկարն Էրդողանի կողմից անխղճություն է որակել։

«Հարյուրավոր բանվորների սպասեցնում են իրար կողքի։ 

Էրդողանը ժապավենի հետևում հեռվից ողջունում է բանվորներին։ Մինչ այս գիշեր այդ բանվորները կպառկեն նույն հիվանդասենյակում, Էրդողանը կշարունակի վայելքը իր 1000 սենյականոց պալատում»,- գրել է Փայլանը։