Կորոնավիրուսի համավարակը պատմության մեջ կրթության ոլորտում ամենամեծ խզումն է առաջացրել. ՄԱԿ

• 04.08.2020, 12:14
•  Աշխարհ

AP

ՄԱԿ-ի գլխավոր քարտուղար Անտոնիո Գուտերեշը հայտարարել է, որ կորոնավիրուսի համավարակը երբևէ տեղի ունեցած ամենամեծ խզման է հանգեցրել կրթության ոլորտում, հայտնում է Associated Press-ը:

Ըստ նրա` համավարակի պատճառով աշխարհի 160 երկրում դպրոցները փակվել են հուլիսի կեսերին` ազդելով ավելի քան մեկ միլիարդ դպրոցականի վրա:
Գուտերեշը նաև նշել է, որ արդյունքում առնվազն 40 միլիոն երեխա ամբողջ աշխարհում մնացել է առանց կրթության «իրենց կրիտիկական ​​նախադպրոցական տարում»:

Նա նախազգուշացրել է, որ սյս գործընթացների արդյունքում աշխարհին «սերունդների աղետ է սպառնում, որը կարող է մարդկության չօգտագործված ներուժի վատնմանը հանգեցնել, խաթարել տասնամյակների առաջընթացը և խորացնել արմատացած անհավասարությունները»:

«Կառավարությունների և գործընկերների կողմից ընդունվող որոշումները հարատև ազդեցություն կունենան հարյուր միլիոնավոր երիտասարդների և առաջիկա տասնամյակների ընթացքում երկրների զարգացման հեռանկարների վրա»,- ասել է Գուտերեշը տեսաուղերձում:

Այս կապակցությամբ նա կոչ է արել վերսկսել դասընթացները դպրոցներում, երբ երկրներում կորոնավիրուսի ներքին փոխանցման գործընթացները վերահսկողության տակ առնվեն: