Կրեմլը գնահատել է Ղարաբաղում ռուսաց լեզվի կարգավիճակի հետ կապված իրավիճակը

Կրեմլը ողջունում է Ղարաբաղում ռուսաց լեզվին երկրորդ պետական լեզվի կարգավիճակի հնարավոր շնորհումը և պատրաստ է օգնել դրա հետագա տարածմանը: Այս մասին, ինչպես  փոխանցում է aysor.am-ը, հայտարարել է ՌԴ նախագահի մամուլի քարտուղար Դմիտրի Պեսկովը:

 

«Ռուսերենն ամեն դեպքում օգտագործվում է Ղարաբաղում, այն օգտագործվում է նաև Հայաստանում, ռուսերենով խոսում են նաև Ադրբեջանում, ռուսերենով հիմնականում խոսվում է աշխարհի շատ վայրերում, ներառյալ՝ նախկին ԽՍՀՄ տարածքում: Այն հաղորդակցության համար հարմար լեզու է: Բնականաբար, մենք դա ողջունում ենք ամեն կերպ և պատրաստ ենք հետագայում ևս նպաստել ռուսաց լեզվի իմացության մակարդակի տարածմանը և պահպանմանը, մենք դա համարում ենք մեր խնդիրը», - ասել է Պեսկովը:

 

Միևնույն ժամանակ, նա պարզաբանել է, որ Ռուսաստանը չի առաջարկում ռուսերենը դարձնել երկրորդ պետական լեզու Հայաստանում և Ադրբեջանում՝ ընդգծելով, որ դա ցանկացած երկրի ներքին գործն է:

 

«Սա բանակցությունների կամ շփումների թեմա չէ, այլ փաստացի իրավիճակ է, երբ ռուսերեն են խոսում ինչպես Ադրբեջանում, այնպես էլ Հայաստանում», - ավելացրել է Պեսկովը: