Ռուս խաղաղապահները ղարաբաղցի աշակերտների համար դասեր են անցկացրել անվտանգության միջոցառումների վերաբերյալ

• 18.12.2020, 10:03
•  ԵԱՏՄ,  Աշխարհ,  ԼՂՀ

Լեռնային Ղարաբաղում հումանիտար ականազերծման ռուսական կենտրոնի զինծառայողները Ասկերանի շրջանի Ճարտար գյուղի թիվ 1 միջնակարգ դպրոցի աշակերտների համար դասեր են անցկացրել պայթյունավտանգ առարկաներ հայտնաբերելիս անվտանգության միջոցառումների պահպանման վերաբերյալ: Այս մասին հայտնում է ՌԴ պաշտպանության նախարարությունը:

«Աշակերտներին պատմել են պայթուցիկ սարքերի դասակարգման և պայթյունավտանգ առարկաներ հայտնաբերելիս գործողությունների մասին: Մասնագետները նաև ցուցադրել են առաջին բուժօգնություն ցույց տալու կանոնները»,- նշված է հաղորդագրության մեջ:

Ականազերծման կենտրոնի զինծառայողները ցուցադրել են ռուս զինծառայողների հանդերձանքի նմուշներ. ականազերծման ՕՎՌ-2 համազորային լրակազմը՝ նախատեսված պայթյունի խոցող գործոններից սակրավորի պաշտպանության համար, ԻՄՊ-Ս 2 ականորսիչները և ԻՆՎՈՒ-3Մ «Կորշուն» որոշ պայթուցիկ սարքերի շարժական որսիչը, որը պայթուցիկ սարքերը հայտնաբերում է ռադիոէլեկտրոնային բաղադրիչների և սխեմաների հիման վրա, փոխանցում է News.am-ը:

Դասերին ընդհանուր մասնակցել է ավելի քան 80 աշակերտ միջին և բարձր դասարաններից, ուսուցիչներ և աշակերտների ծնողներ: