Ատոմակայանի գործունեության հետ կապված մտավախությունները բյուրեղանում են

Ժամանակին, երբ սույն իշխանությունը որոշեց հրաժարվել հայկական ԱԷԿ-ի երկրորդ էներգաբլոկի վերազինման նպատակով տրամադրված ռուսական վարկից և աշխատանքները շարունակել սեփական միջոցներով, կար տրամաբանության խախտում. ռուսական վարկի պայմանները շատ ավելի շահավետ էին, քան հավանական ցանկացած այլ միջոցների ներգրավումը:

Այսօր Ատոմակայանի տնօրենի առաջին տեղակալը լրագրողների հետ զրույցում զգուշացրել է, որ «ռիսկի գործոն կա, որ հայկական ԱԷԿ-ի շահագործման ժամկետը չի երկարաձգվի»: Փոխտնօրենն, իհարկե, նաև ասել է, որ ռուսական ընկերությունների փորձը հաշվի առնելով, այդ ռիսկերը կկրճատվեն, ԲԱՅՑ՝

երկու կարևոր արձանագրում.

կա՛ ռիսկի գործոն (կամ արդեն բարձրաձայնում են դրա մասին),

հույսը, միևնույն է, «ռուսական ընկերությունների փորձն է»…

Առհասարակ անիմաստն է հարցնելը, թե ինչու կառավարությունը հրաժարվեց ռուսական վարկից, այն իրավիճակի ֆոնին, որին այսօր հասել ենք վերջինիս պատճառով:

Փոխարենը հետաքրքիր է՝ այդ ժամանակ զգուշացվե՞լ են արդյոք նույն ՀԱԷԿ-ի տնօրինության կողմից առկա ռիսկերի մասին, և արդյո՞ք այսօր ռիսկի գործոնն ավելի արտահայտված չէ հե՛նց այդ քայլի հետևանքով…»