ԱՄՆ պետդեպն արձանագրել է ԼՂ պատերազմում Թուրքիայի ներգրավվածությունը, Ադրբեջանի հանցագործությունները

• 02.04.2021, 12:50
•  Ամերիկա,  Տարածաշրջան,  Աշխարհ,  Հայաստան

Alex Wong/Getty Images

Միացյալ Նահանգների պետքարտուղարությունը 2020 թվականի Մարդու իրավունքների զեկույցի Ադրբեջանին առնչվող հատվածում արձանագրել է Լեռնային Ղարաբաղի պատերազմում Թուրքիայի աջակցությունը և Ադրբեջանի կողմից իրականացված ռազմական հանցագործությունները:

Պետդեպարտամենտի զեկույցում հիշատակվել է դեկտեմբերի 10-ին Amnesty International-ի հրապարակած զեկույցը՝ հիմնված 22 տեսանյութերի վրա, որտեղ ևս արձանագրվել էին ադրբեջանցի զինծառայողների կողմից հայերի խոշտանգման ու սպանության դեպքեր, որոնք կազմակերպությունը որակել էր որպես «պատերազմական հանցագործություն»: Նշվել է, որ նմանօրինակ անմարդկային վերաբերմունք է ցուցաբերվել նաև հայ ռազմագերիների նկատմամբ: Բացի այդ, արձանագրվել է, որ Ադրբեջանի իշխանությունները Լեռնային Ղարաբաղում օգտագործել են արգելված տեսակի զինամթերք, մասնավորապես կլաստերային ռումբեր:

Նշվել է, որ թեպետ ադրբեջանական կողմը հերքում է, սակայն Հայաստանի կառավարությունը հաղորդել է, որ Ադրբեջանի զինված ուժերն օգտագործել են հրթիռներ ու ռումբեր՝ թիրախավորելով Ստեփանակերտը և քաղաքացիական ենթակառուցվածքները՝ Լեռնային Ղարաբաղի ամենամեծ քաղաքը թողնելով առանց ջրի և էլեկտրականության:

Պետդեպն արձանագրել է, որ պատերազմում Ադրբեջանը կարողացել է հաջողության հասնել թուրքական աջակցության շնորհիվ: