Վիլյամ Սարոյանի "Կիսալուսնի Ծովածոցը"՝ հայկական նոր ֆիլմում

• 11.02.2014, 11:33
•  No-politics

      Վիլյամ Սարոյանի չորս նովելներն ամփոփող "Կիսալուսնի Ծովածոցը" ստեղծագործությունը կներկայացվի չորս կինոնովելից կազմված լիամետրաժ խաղարկային ֆիլմում: Այն հանդիսատեսի դատին կներկայացվի մարտի 6-ին Մոսկվա կինոթատրոնում: Ռեժիսոր Մարինե Զաքարյանի հեղինակած ֆիլմի գործողությունները ծավալվում են Կիսալուսնի Ծովածոց կոչվող մտացածին քաղաքում: Ինչպես նշված է Պարալլելս Ֆիլմի, Շարմ Հոլդինգի և Հայաստանի ազգային կինոկենտրոնի տարածած մամլո հաղորդագրության մեջ, ֆիլմի հերոսները պատանիներ են, որոնց անկեղծ ու ազնիվ հայացքը կյանքին` ֆիլմի հիմնական առանցքն է: Ֆիլմը հասունացման մասին է, երբ հերոսները ձեռք են բերում ամենակարևոր բանն աշխարհում` հասկանալու կարողությունը: Տարվա չորս եղանակներին ծավալվող պատմությունները դառնում են գովք` Աստծու ստեղծած աշխարհին և Մարդուն:
      Պարալլելս ֆիլմ կինոընկերությունը 2012թ-ից սկսել է առաջին ֆիլմերի աջակցության ծրագիր` ջանալով օժանդակել հայկական նոր կինոալիքի ձևավորմանը: 2012ին ընկերությունը դիմել է Վիլյամ Սարոյանի գրական ժառանգության իրավատեր Սթենֆորդի համալսարանին և 2013-ին անգլիական Pollinger ltd-ից ստացել է Սարոյանի պատմվածքների էկրանավորման իրավունքը: Նույն թվականին` Մոսկվայի 35-րդ միջազգային կինոփառատոնում, կայացել է "Փասիանի որսորդը" կարճամետրաժ ֆիլմի պրեմիերան, որը "Կիսալուսնի Ծովածոցը" ֆիլմի "Աշուն" հատվածն է: 2013ին "Փասիանի որսորդը" ստացել է Ազգային կինոմրցանակաբաշխության ՀԱՅԱԿ մրցանակը` Լավագույն դեբյուտ անվանակարգում: Մասնագետների գնահատմամբ` Մարինե ԶԱՔԱՐՅԱՆԻ ֆիլմը աչքի է ընկնում դասական գրողի ժառանգության հանդեպ հոգատարության ու ինքնուրույն մեկնաբանության համադրմամբ, ինչպես նաև տեխնիկական թարմությամբ և թվային տեխնոլոգիաների համարձակ կիրառմամբ:
      2012ից ֆիլմի արտադրությանը աջակցել է Հայաստանի ազգային կինոկենտրոնը` դեբյուտային ֆիլմերի աջակցության ծրագրով: 2013թ-ին Պարալլելս Ֆիլմ կինոընկերությունը և Շարմ Հոլդինգը միավորել են իրենց միջոցները` ֆիլմի արտադրությունն ավարտելու համար:
      Ֆիլմում իրենց դերասանական խաղով հանդես են գալիս ինչպես փորձառու, այնպես էլ նորահայտ դերասաններ: Ֆիլմում նկարահանվել են Սոս և Կարեն Ջանիբեկյանները, Աշոտ Ադամյանը, Նանոր Պետրոսյանը, Վիվիյեն Բաստաջյանը, Նարինե Գրիգորյանը, Արա Սարգսյանը, Վարդուհի Ռուշանյանը, Մովսես Ստեփանյանը, Կարեն Խաչատրյանը: Պատանիների դերերում նկարահանվել են` Սամվել Վարդանյանը, Ալեքս Բաբայանը, Անի և Սոնա Գալստյանները, Սարգիս Հարությունյանը, Աստղիկ Վարդանյանը, Ամալյա Զաքարյանը:
      Ինչ վերաբերում է ֆիլմի նկարահանող անձնակազմին, ապա նշվում է, որ ֆիլմի օպերատորն է Միհրան Ստեփանյանը, կոմպոզիտորը` Լիլիթ Նավասարդյանը, հնչունային ռեժիսորը` Լևոն Նավասարդյանը: Ֆիլմում օգտագործված է Come on-a my house երգը` Վիլյամ Սարոյանի խոսքերով, Ռոզ Բաղդասարյանի երաժշտությամբ, որում հնչում է Սարոյանի ձայնը: Ֆիլմի պրոդյուսերներն են` Հովհաննես Գալստյանը, Գևորգ Գևորգյանը, Կարեն Ղազարյանը:
      Ավելացնենք նաև, որ երևանյան պրեմիերայից հետո նախատեսվում է "Կիսալուսնի Ծովածոցը" ցուցադրել Երևանյան կինոթատրոններում, ներկայացնել ՀԱՅԱԿ ազգային կինոմրցանակաբաշխությանը, ապա` Կաննի կինոշուկայում:
"Արմեդիա" ՏՎԳ
11.02.2014