Վարորդներից տեղեկություններ են հասել, որ Գորիս-Կապան ավտոճանապարհին ադրբեջանցիները ստուգել են երեք հայկական մեքենա. Գորիսի փոխքաղաքապետ

• 15.09.2021, 14:33
•  Աշխարհ,  Հայաստան

Վարորդներից տեղեկություններ են հասել, որ Գորիս-Կապան միջպետական ավտոճանապարհին տեղակայված ադրբեջանցի սահմանապահներն ու ոստիկանները երեկ կանգնեցրել և ստուգել են երեք հայկական մեքենա, Aysor.am-ի թղթակցի հետ զրույցում ասել է Գորիսի քաղաքապետի տեղակալ Կարո Քոչարյանը։

Թե քանի տոկոսով հավաստի տեղեկատվություն է սա, մեր զրուցակիցը դժվարացավ ասել՝ պատճառաբանելով, որ անձամբ տեղում չի եղել, իրեն միայն խոսակցություններ են հասել։

Այսօր նմանօրինակ միջադեպի մասին նոր տեղեկություններ Կարո Քոչարյանը չուներ։

«Իմ մտավախությունը կարծես հաստատվում է (նկատի ունի  Aysor.am-ի հետ նախորդ զրույցում հայտած իր այն միտքը, որ ադրբեջանցիները, հնարավոր է, առաջիկայում սկսեն ստուգել նաև հայկական պետհամարանիշերով ավտոմեքենաները)»,- ասել է Գորիսի փոխքաղաքապետը։