2021թ. բոլոր հարկատեսակների գծով գրանցվել է եկամուտների աճ. Ռուստամ Բադասյան

• 01.06.2022, 17:15
•  Աշխարհ,  Հայաստան

2021 թ. հնարավոր է եղել ապահովել պետական բյուջեի եկամուտները` չնայած կորոնավիրուսային համավարակով պայմանավորված համաշխարհային տնտեսական ճգնաժամի եւ ռազմական գործողությունների հետեւանքներին: Այս մասին բարձրաձայնել է Պետական եկամուտների կոմիտեի նախագահ Ռուստամ Բադասյանը հունիսի 1-ի ԱԺ տնտեսական հարցերի եւ ֆինանսավարկային ու բյուջետային հարցերի մշտական հանձնաժողովների համատեղ նիստում «Հայաստանի Հանրապետության 2021 թվականի պետական բյուջեի կատարման մասին» տարեկան հաշվետվության նախնական քննարկումների ժամանակ:

Զեկուցողի խոսքով` հաշվետու տարում հարկեր-ՀՆԱ ցուցանիշը կազմել է 22,7 տոկոս, որը 0,2 տոկոսով գերազանցել է 2021 թ. համար սպասվող ցուցանիշը: Կառույցի նախագահի տեղեկացմամբ` բոլոր հարկատեսակների գծով գրանցվել է եկամուտների աճ` բացառությամբ ակցիզային հարկի` պայմանավորված ծխախոտ արտադրող որոշ տնտեսվարողների շրջանում արտադրանքի ծավալների կրճատումով: Նշվել է, որ եկամուտների ցուցանիշների վրա բացասական ազդեցություն է ունեցել ավելացված արժեքի հարկի, եկամտային հարկի եւ ակցիզային հարկի գծով վերադարձված գումարների աճը: Այն կազմել է 180, 2 մլրդ դրամ:

Ըստ Ռուստամ Բադասյանի` 2021 թ. ԱԱՀ-ի գծով վերադարձվել է 146,7 մլրդ դրամ, եկամտային հարկի գծով` 32,6 մլրդ դրամ:

«Հաշվետու ժամանակահատվածում հիփոթեքային վարկի սպասարկման համար վճարվող տոկոսների մասով վարկառուներին եւ համավարկառուներին է վերադարձվել 22,7 մլրդ դրամ եկամտային հարկ. այն նախորդ տարվա համեմատ աճել է 70,4 տոկոսով»,- ընդգծել է ՊԵԿ նախագահը:

Զեկուցողն անդրադարձել է կոմիտեի կողմից ոլորտի բարեփոխման ուղղությամբ իրականացված վարչարարությանը: Մասնավորապես, իրականացվել են էլեկտրոնային համակարգերի եւ ենթակառուցվածքների արդիականացման, հարկ վճարողների սպասարկման որակի բարձրացման եւ մատուցվող ծառայությունների ընդլայնմանն ուղղված միջոցառումներ:

2021 թ. ներդրվել է օրինապահ հարկ վճարողի հավաստագրի տրամադրման նոր համակարգ: Պետական բյուջեի եկամուտների ապահովման գործում հարկ վճարողների դերը հատկանշելու նպատակով օրենքով սահմանվել է հարկ վճարողի օրը, ներդրվել է հիփոթեքային վարկի սպասարկման համար վճարվող տոկոսների գումարների վերադարձի էլեկտրոնային հարթակ, ինչպես նաեւ մաքսային վճարների եւ մաքսային մարմինների կողմից գանձվող այլ վճարների էլեկտրոնային եղանակով վճարային համակարգ:

Համալիր հարկային ստուգումների մասով որդեգրվել է ստուգումների քանակը հնարավորինս կրճատելու եւ դրանք ավելի ռիսկային ոլորտներ ուղղելու ռազմավարությունը: «1156 համալիր հարկային ստուգումների արդյունքում 2021 թ. արձանագրվել է 28,3 մլրդ դրամ լրացուցիչ հարկային պարտավորություն»,- ընդգծել է Ռուստամ Բադասյանը: